Deadpool movie in mipi nih uar ngaimi Canadian- American actor Ryan Reynold le a nupi Blake Lively nih US ah phungninglo in a pemmi miphun dang hna caah US$2 million an hlut.
$1 million cu miphun dang bawmhnak bu NAACP nih sihni hlannnak caah a hman lai. Adang $1 million cu Mipem Ngakchia caah Mino Bu (YCIC) nih, chungkhar he tthen a tongmi mipeem ngakchia zohkhenhnak caah a hman lai.
Phungninglo in US an luh ruangah cozah nih nulepa he tthenmi asiloah amah tein phungninglo in US a lutmi ngakchia pawl cu sihni, mi bawmtu le pumpek rianttuan hna nih bawm hna seh tiin an hlut hi asi.
Nuva hna hi zatlang tlukruannak kong ah a holh lengmangmi an si i Trump Acozah nih phungninglo mipeem a tlaihmi an lungtlin lonak kong zong an rak chim tawn.
2017 ah Ryan Reynolds a nupi Blake Lively nih, “Trump Acozah nih mipeem a tuahto hna ning hi, nu pakhat le hringtu nu pakhat dirhmun in le midang zawn a ruatmi minung ka sinak dirhmun in ka lungrethei ngaingai,” tiah a rak chim.
“Tangka a kan bawmtu Ryan le Blake cungah kan i lawm tuk. Tangka cu ngakchia hna caah bawmtu tha a si ko lai,” tiah Young Center for Immigrant Children Rights i Executive Director simi Maria Woltjen nih a chim.
Ni kum ahkhan George le Amal Clooney nih Young Center sin ah US$100,000 bawmhnak an rak pek ve.
