Washington state i Spokane khuapi ah a ummi kum 62 pa cu setbing aa cit lio ah fak tukin aa let i lungfim loin a um. Vanṭhat ah Apple Nazi aa rak khihmi nih a tlukmi cu a hngalh i mi khamhtu 911 a call piak.
Kum 62 pa Bob Burdett a lung fim ahcun ambulance chungah a rak um cang, tiah Fox59 le Seattle Times thawngzamhca nih nizaan ah an ṭial.
‘Tluk hngalhnak’ feature a ummi Apple Nazi nih cun aa khihtu kha a tluk hnu in minute 1 chung a cawl lo ahcun automatic in 911 a call.
Burdett cu kum 2015 in setbing cit aa thokmi asi. “Keimah lawngin kaa cit tawn lai ti ka hngalh caah ‘tluk hngalhnak’ a ummi Apple Nazi kai cawknak asi. Tluk a hngalh tak/lo zong ka rak hngal lo nain a hngalh ko hita” tiah a chim.
Apple Nazi nih cun 911 a call piak pinah, emergency contact ah a chiahmi a fapa zong cakuat in thawng a thanhpiak.
Ambulance nih sizung a phakpi hnu ah a fapa 2 cu Apple Nazi nih ‘kahin a um…’ tiin ca a kuat ṭhan hna.
“Ka upa cu sizung pawng ah mawttaw aa mongh lio ah Apple Nazi nih avoi 2nk thawng a kan thanh i sizung chung ka pa sinah a phan colh,” tiah Burdett a fapa nih Facebook ah a ṭial. “Apple Nazi nan ngeih cun, Hard Fall detection kha rak ong cio uh” ati.
Burdett vanchiat a ton cu September 15 ahkhan si. A liangruh le hnakruh a palh, cun a mittlang an ṭhit. A thaizing ah sizung in a ṭum i atu cu setbing aa cit kho ṭhan cang.
Apple nazi nih minung nunnak a khamhmi a tam ngai cang. A tlumi lawng si loin lungtur a ngeimi pawl zong tampi a khamh cang hna.
Apple Nazi ahcun caaan lawng si loin;
- tluk hngalhnak
- lungtur/thikal hngalhnak
- tlik exercise hngalhnak
- phone call
- hla ngaih, tbk., a ngahmi tam ngai a um nain phone bantukin ni fatin battery tun peng hau.
Ni kum i Apple Nazi Series 4 a chuahka ah Wall Street Journal nih tluk hngalhnak a test lio VIDEO. September 10 ahkhan Series 5 a chuak tthan cang.
