October 13 i Japan ram ah tuahmi Kachin miphun Aung La Nsang le US Filipin pa Brandon Vera an i phomhnak puai zohnak ahkhan Myanmar ram, khua 3 in minung 4 an thi.
Mah konghe pehtlai in Aung La Nsang nih “Tha a ka petu keimah puai zohnak in an thi ti ka theih cu ka lungttha lo tuk. Lung lei zawtnak a ngeimi pawl cu puai result a fian hnu lawngah zoh hna seh ti ka duhpiak hna. Hi bantuk zaangleknak cu i velh bantuk asi tik lung lei zawtnak a ngeimi hna caah ttih a nung ngai. Thazaang a ka petu mipi pawl sin ah chim ka duhmi cu lung zawtnak a ngeimi na si ahcun kaa thuatnak puai cu zoh hlah ko” tiah 7Day Daily ah a chim.
Aung La Nsang cu naite Vera he an i tthuatnak ah a kut sialpi ruh a palh i sibawi te nih surgery an tuah.
“Kuthruk kaa phoih ah ka sialpi a fak. A fak tuk cu silo. Xrays in an ka thlak i ka sialpi ruh a palh. Ka sialpi kut ruh a palh ruang ahkhan si bawi te nih operatio an tuah i thir fung 2 an bunh. Surgery kaa tuahnak zarh 2 leng si cang. Tu hnu zarh 4 hrawng ahcun training hna ka tuah kho cang lai. Nan lungrethei hlah uh” tiah Aung La Nsang nih a ti.
Aung La Nsang cu ONE he puai 10 i tthua dingin lungtlinnak an ngei i naite Japan tuahmi kha avoi 9nk aa thuat a si.
“ONE he lungtlinnak kan ngeihmi ah voi 9 kaa lim cang i atu voi khat a tang. Keimah tu nih cun a tlawmbik puai 3 silole puai 4 tel cu i tthuat rih ka duh. Ka kumkhua zong cu MMA um ding ah ka ngakchia ti lo. Kum 2 hrawng telawng caan a um cang. A tangmi puai hi cu a tthabik in i celh ka duh.”
“Kum 2020 i thla 3nk hrawng ah Middleweigh Champion sui taisawm kilveng dingin i tthua ding ka si. Timhtuahnak ka ngei cang nain keimah he aa tthua ding hi mi zei a si a fiang rih lo” tiah Aung La Nsang nih a chimfawn.
