Naite ahkhan NLD party lutlai Pi Aung San Suu Kyi hruainak in Naypyitaw, Zabu Thiri Township ah a ummi NLD party member pawl cu an inn ah tonnak an ngeih hna.
Myanmar cozah nih Covid-19 karh hlah seh tiin minung 30 nak tam siseh a bu in nan um lai lo timi nawl a chuah.
Cu zulh ding cu Pi Aung San Suu Kyi nih a buar tiin NLD party member hlun pakhat nih August 24 ah Ngandamnak Vuanci Zung sinah report a tuah.
“No.1 Zabu Thiri palek sakhan le penguk zung ah pumpak kal in reportnak ca ka pek hna. Cun, Ngandamnak Vuanci Zung ah satteih in ca ka kuat cang,” tiah NLD party member hlun U Tun Myint nih a chim.
“Rammi paoh hi upadi cungah kan um lo. Cozah nih nawl a chuahmi paoh mipi nih kan zulh. Cozah rianttuan zong nih an zulh ve a herh timi te kha mipi nih hngal hna seh ti ka duh caah ka tuahmi a si,” tiah U Tun Myint nih a chim.
August 19 ah Pi Aung San Suu Kyi, NLD vice chairman [1] Dr Zaw Myint Maung, President hlun U Htin Kyaw le atu lio MP aa cuh ding pawl cu Union Election Commission (UEC) sinah nawl an hal hnu ah Zabu Thiri khua um NLD party member pawl sinah an kal hi a si.
“A leng mipi nih ruahchannak an ngeihmi Pi Aung San Suu Kyi hmuh/zoh an duh tukmi cu kan kham kho hna lo. Nain, Covid-19 zulhphung ningin kan umtthu ko. Kut thiang tein kan i tthawl hnu ah inn chungah kan lut. Inn lengah mi an tampi, mino ngakchia an tampi. Mino hna ruahchannak cu kham khawh a si lo” tiah Dr Zaw Myint Maung nih a chim.
U Tun Myint nih nawl ngeitu sinah report ka tuahmi cu kan hngah rih ko lai i zeihmanh an tuah lo ahcun duhlo langhternak ka tuah te lai tiah a chim. – 7Day Daily
