Pu Rual Peng i a thaisung Pi Tha Iang (Philip nu) nih Lungthli ruah loin tuzing deilei 3am hrawngah a ihnak hmun in mual a kan liam tak e.
Pi Tha Iang (kum 27) hi Hakha Peng, CinKhua ah khua a sami Pu Ceu Tthai le Pi Sui Tial hna i an fanu hniang a si. Amah hi Melbourne Nichuah lei ah khua a sami le VCBC Khrihfabu chungtel a si.
Pi Tha Iang hi Melbourne khua ah khua a sami Pu Lai Uk Nawl, Pi Caan Kip Sung, Pi Cer Hliang, Pi Dawt Thluai Meng hna i an nau hniang a si. Pi Tha Iang le Pu Rual Peng hi Fapa pahnih an ngei I Philip Biak Peng Mang (kum 4) le Victor Cung Lian Hup (thla 3) te lawng a si rihmi an si.
Pi Tha Iang hi a dam ko. Zaan zongah a u le he an i leng hna i nuam tein bia an I ruah. Zan suimilam 9pm hrawng zongah an pa he telephone in tha tein an i chawn ko. An pa hi zaan riantuan a si caah tlai hnu ah inn a lawi citicun ruahlo tuk in ihnak ah a kan liam taak si a si. A fahniangte Victor hi thla 3 telawng a si fawn tikah ngaih a chia i lung a kuai khun ko.
Atu hi VCBC Biakinn ah chungkhar hnemhnak le thutpinak caan an hman lio a si. Ruakvuinak Program kong a fiang kho rih lo.
Chungkhar hna cungah Bawipa daihnak um hram ko seh.
