Bangladesh ram ah Covid-19 mizaw an karh ngai nain coronavirus mizaw ca tuahmi ihkhun tampi cu an lawng hna.
Covid-19 mizaw tampi nih sizung um an ttih ruang ah ihkhun thong tampi an lawng hna.
Covid-19 mizaw pawl nih sizung ah thih nakin inn ah thih kan duh deuh tiah bo takin sizung rianttuan pawl cu an ti hna.
Bangladesh ram ah Covid-19 zawtnak ngei hmuhmi dihlak 180,000 hrawng an si. Nifatin ngawt in coronavirus mizaw thar 3,000 hrawng an i chap. Nizaan tiangah Covid-19 in a thimi 2,275 an si.
Nain, siilei thiamsang hna nih Bangladesh ram ah Covid-19 testmi a tlawmtuk caah hinak zong in an tampi kho an ti.
Dhaka khualipi ah Covid-19 mizaw thlopnak ca timhtuahmi ihkhun 6,305 lak ah ihkhun 4,750 cu an lawng hna.
Covid-19 dohnak ca hrimhrim ah sakmi ihkhun 2,000 tlum sizung thar ah Covid-19 mizaw 100 hrawnglawng an um.
Ngandamnak Zung nih,”Covid-19 mizaw tampi cu inn ah an i zohkhenh hna ruangah sizung ah ihkhun an lawn hna hi a si” a ti.
UN nih Bangladesh rammi 80,000 leng sinah survey a tuah i 44% nih sizung kal an tih tuk. Covid-19 bawmhnak zung zong an chawn ngam lo ti a si.
Covid-19 ngeimi pawl cu an zawtnak zual tuk hnu lawngah sizung an panh. Inn ah a thimi cu mi tlawmte an si.
Min langhter lomi nu pakhat nih “kan chungkhar ah minung 8 kan um i ka nu Covid-19 a ngeih ruangah kan dihlak in inn ah kan i erh hna.
“Ka nu cu a zawtnak zual tuk nain sizung ah kalpi loin oxygen dur kan hlan i cutin thaw kan pek.
“Sizung ah a ummi Covid-19 mizaw pawl cu sibawi le nurse te nih zawtnak an kan chawnh sual lai ti an phan caah an pawng zongah an kal ngam lo tiin kan theih,” tiah a chim.
Bangladesh sizung pawl cu Covid-19 zawtnak a um hlan i thangchiat a tong lengmang cang. Ni kum ahkhan minung 500,000 leng cu ngandamnak i thlop dingin India ram ah an kal. – AFP
