Bollywood minta minthang Akshay Kumar nih nifatin caw zun ka ding tiin aa phuan.
India rammi tampi nih caw zun din cu ngandamnak caah a ttha i coronavirus zawtnak zong a kham khawh tiin an zumh caah a dingmi an tampi.
Kumar cu India Prime Minister Narendra Modi party a ttanh ngaimi a si. Modi party nih caw ek in zunthlum le cancer thlopnak sii sernak caah dollar million tampi an hmanmi zong tha a pek ngai.
Caw zun din hi ngandamnak caah a tthat/lo cu zeihmanh scientific tehte an hmu rih lo nain Modi party member pawl nih caw ek le zun nih coronavirus a damh tiin an chim pah lengmang.
Kum 53 simi minta Kumar cu British pa Bear Grylls he show ah vui ek in sermi lakphak zong an din.
Kumar nih Nilini ahkhan social media ah live a thlah i “caw zun hi India sii phunkhat a si caah nifatin ka din peng” tiah aa phuan.
Hindu tampi nih cun caw hi saram thianghlim a si tiin an zumh i a zun cu ngandamnak sii caah an din lengmang.
June thla ahkhan India ram hruaitu Prime Minister Modi nih yoga tuah nih Covid-19 a kham khawh a ti i Ttai-yin-se le Yoga Vuanci Zung an dirh.
India ram ah Covid-19 in a zawmi 4.6 million an si cang i 76,000 an thi cang. – NST
