Kalay peng biaceihzung nih kum tlinglo ngakchia nu 2 tlaihhrem ruangah thongdan kum 43 a pekmi Evan Lal Biak Lar cu Sagaing ramtthen biaceihzung nih kum 17 lawng thongthlak ding a ti caah Kalaymyo hrambunh zatlangbu pawl nih duh lonak kan langhter lai an ti.
Kalaymyo a hnulei Letpanchaung khua ah a ummi Evan Lal Biak Lar@Lar Boih cu kum 14 le kum 15 nu pahnih a tlaihhram hna ruangah Kalay peng biaceihzung nih kum 43 thongthlak dingin 2019 January 16 ah bia a rak khiahpiak.
Mahkongah, Evan Lal Biak Lar i a sihni nih Sagaing ramtthen biaceihzung ah nawlnak a tuah caah kum 43 thongdan in kum 17 ah an tthumhpiak.
Nain, Kalaymyo hrambunh zatlangbu pawl nih thongdan an tthumhpiakmi cu an lungtling lo.
Upper Chindwin Youth Network in Ko Kyaw That nih,"zeiti hmanh in kan cohlang kho lo. Nawlnak an tuah ruangah Naypyitaw in ngakchia nu 2 cu kan auh hna. "Kanmah zatlangbu le nu bu pawl he i bawm in Sagaing ramtthen biaceihzung nih a zaangfahmi cu cohlan lo ding le Kalay peng biaceihzung nih kum 43 thongdan a pekmi ning tein pehzulh a si khawh nak hnga upadi ningin zeitindah kan ven lai timi kong cu tuni ah ngakchia 2 telhin i meeting kan tuah" tiah a chim. Chin state, Falam khua in nu ngakchia 2 cu sanginn kai dingin Lar Boih te inn ah an rung um i Taungphila le Latpanchaung ah siangin an kai. Evan Lal Biak Lar nih kum 2015, June thla ah kum 15 le kum 2018 April thla ah kum 14 cu a tlaihhrem hna tiin ngakchia hna an nulepa nih Tahan palek sakhan ah 2018 April 13 ah an report. Kalaymyo hrambunh Dingdi Nubu lutlai Pi Malsawmi zong nih,"ngakchia tlaihhremtu thongdan tthumhpiak cu kan cohlang kho lo. "Ngakchia deuh nu hoi hna cu mahtluk lungrawh in a um lio caan ah thongdan an tthumhpiakmi hna hi ruah ahcun cohlan awk tthalo mi a si. Cun, anmah lei nih tangka an duh ruangah hitin an tuahmi a si tiin an chimmi zong hi kan duh lo" tiah a chim. Evan Lal Biak Lar thongdan tthumhmi kongah Dingdi Nubu, Women For Justice le Upper Chindwin Youth Network hna hruainak in duhlonak an langhter lai tiah kan theih. - Khonumthung
- Advertisement -
