Denmark — Kum 14 Chin pa Phun Mang cu bawlung chuih a thiam tuk caah Denmark ram football club minthang Esbjerg fB (EfB) nih a lak.
EfB club cu 2018-2019 Danish Superliga ah 3nk a ngahmi club asi. Danish Superliga cu Mirangca cun Denmark Super League tinak asi, i Denmark ram ah a sang bikmi bawlung chuih zuamnak asi. Kawlram he tahchun ahcun Myanmar National League bantuk asi.
Phun Mang cu Denmark ram aiawh U-12 team zong in Spain ram ah a rak chuih ve i 2nak an rak ngah.

“Liverpool club ah chuih ka duh,” tiah Phun Mang nih a chim.
Chin state Matupi khuami Pu Khin Mang fapa asi. Atu hi Denmark ram, Bornholm khua ah an um.
Phun Mang cu Denmark media zong nih an tial pah tawn. TV2 Mellem OS zong nih interview a tuah.
Phun Mang hi kum 4 a rak si lio tein R.I.K club ah a rak lut, i RIK club caah U-15 team in a chuih liomi asi.

September thla thok ahkhan EfB nih a U-15 team caah hneksaknak training a tuah hnu ah atu bantukin kum 1 sachoh in a hlan colh hi si.
RIK nih “kan sin na luh a ni 1nak tein a thiam tuk kan in ti pengmi na si. Hlawh pekmi bawlung chuih thiam si dingin lungthli na tummi a tlinnak dingah atu cun vawleipi aa ong cang,” tiah lawmhpinak ca a tial.
“Na hmailei lamthluan ah na hlawhtling caamcin ko seh tiah RIK nih kan in duhpiak. Kan club nih i lunghmuih takin kan in cuanh peng ko lai,” ati.

Phun Mang cu bawlung chuih a thiamtuk caah Farum khua hrambunh FC Nordsjælland zongah training tuah an sawm lengmang.
Kum 12 a rak si lio, 2017 zongah ‘bawlung chuih na thiam tuk, bawlung chuihnak caah na herhmi cawknak ah hmang’ tiin Wonderfestiwall group nih Denmark tangka 5,000 a rak bawmh.