Zahan August 27 cu Puchong um Chin Student Organization (CSO) sianginn ah kan leng. An saya/ma te hi mino tete, kum 20 hrawng an si nain an rianttuanmi le miphun an dawtnak lungput hmuh tikah upat awktlak taktak an si.
Kan miphun chungah hi bantuk bochan le upat awktlak mino kan rak ngeih hna cu lawmh a um tuk hringhran.
An sayaci John Lian, kum 21 nih CSO sianginn ah lahkhah ngah lo pumpek tein rian a ṭuannak kong cu hitin a chim.
“Kei hi CSO sianginn ah a rak kai balmi ka si, kai lim i rian ka ttuan hnu ah CSO sayaci nih phone aa ka chawnh i ‘cachimtu kan i za ti lo, kan bawm ve…’ aa ka ti.
“Ka rak kainak sianginn zong asi pinah ‘Laimi sianginn te i cachimtu i zat lo cu’ tiah ka siarem lo tuk caah rian i phuak in ka ṭuannak si,” tiah a chim.
Video ahhin tling tein zoh ve
CSO cu ramdangmi sinah bawmh hal chom in tuahmi asi caah cachimtu saya/ma lahkhah pek awk tiang cun bawmhnak an hmu kho lo. A caan ah thla 1 RM100 in RM300 karlak te phone card cawknak an i ṭhen tawn hna.
Lengah nuam tein rian a ṭuan cuahmah i thla fatin RM1,500 hrawng peng a ngahmi nih rian i phuah riangmang in lahkhah ngah lo tein CSO ah a kumkum in an ṭuan hi cu miphun dawtu taktak an si.
Hlan lio ahcun Malaysia um Chin ralzaam ngakchia hna cu sianginn kai kho loin inn ah an rak um peng. “Hiti cun kan fale thong tampi an tthangcho kho lai lo, hmailei ah kan miphun tthancho dawntu tiang asi lai” tiin Malaysia phan Chin university siangngakchia pawl nih 2005 ah inn an hlan i ca an rak chimh hna. Cucu ‘Chin Student Organization (CSO)’ tiin min an bunh.
Cachimtu pawl cu lengah rian an rak ttuan, an hmuhmi lahkhah in inn hlan man an pek i an i manh caan paoh ah Chin ngakchia pawl cu ca an rak chimh peng hna. Ngakchia an rak tam tuk caah lengin an hmuhmi lahkhah nih a zo ti hna lo.
UNHCR le ramdangmi sinah bawmh an hal i cutin nihin tiang CSO sianginn a hmun. Chin ralzaam ngakchia 5,000 leng (kum 4 in 17 kar) ca an chimh cang hna. Hlan ahcun Malaysia ram Chinmi tamnak hmun 7 ah sianginn an rak tuah.
Ram thumnak an kal thluahmah caah hnu ahcun CSO Kajang le Jalan Ipoh cu an ngol i sianginn 5 a taang. Hnu deuh ah CSO Sentul an ngol tthan i 4 a taang. Tu kum in atutiang cu CSO Cheras le Puchong lawng a taang cang.
Malaysia ram ah Chinmi 40,000 leng kan um rih bang, ngakchia an tampi. Chinmi nih tuahmi kan fale sianginn kainak dang tete zong an um pah. Nain annih cu Khrihfabu tangka le pengtlang tangka in tuahmi an si hna i an saya/ma te zong inn pek ei cawm pinah lahkhah RM800 in RM1,600 kar an pek hna.
CSO lawng hi Chin khrihfabu nih tuah lomi, anmah saya/ma te nih ramdangmi sinah bawmh hal chom tein tuahmi le saya/ma te zong lahkhah ngei lo pumpek taktak in a ttuanmi an si. Tuah hmasa bikmi sianginn le Chin ngakchia tambik a ser cangtu zong asi.
