20.3 C
Hakha
Sunday, April 18, 2021
- Advertisement -

Ṭial Tharmi

China nih US a kap khomi missile aa cua

Zahan October 1 ah China nih Kum 70nak Ram Dirh Ni puai a tuah i ralkap le hriamnam tam taktak in a thazaang a langhter, a ser tharmi ṭihnung hriamnaam tampi cu vawleipi hmuh in a phozar.

China cu US lonh in vawlei cungah a rum bikmi le a ṭhawng bikmi si aa timmi asi. 2025 ahcun vawlei cung thilri vialte hi China nih kan ser khawh dih cang lai i a rumbik kan si cang lai, tihi aa tinhmi asi. Rum lawng si loin ralkap thazaang zongin vawlei cungah a ṭhawng bik siangpahrang bantuk si aa tim.

Zahan puai ah a langhtermi hriamnam lakah, nuclear bomb 10 bunh khawhmi vanhramdeng zuang rocket/missile ‘Dongfeng 41’ zong aa tel. Nuclear bomb 10 bak bunh khawhmi le bomb cu hmun dang cio ah a kap khomi missile asi caah atu lio US le Israel missile khamnak nih a kham kho lai lo.

15,000km leng hla a kap khomi DF-41 missile cu China ram in kah ahcun US a phan kho lai. US le China hi 11,600km lawng aa hlat.

2019 January tiangah China nih nuclear bomb 290 a ngeih i US nih cun 6,185 a ngeih, tiah Stockholm International Peace Research Institute nih a phuan. Nain, China nih DF-41 missile a ser cang si kaw a rauh hlan ah a ralkap thazaang ṭhawnter chin dawh asi.

Zahan puai ah China ralkap pawl nih radar tlaih khawh lomi ralkap vanlawng J-20 stealth fighter pawl le bomb thlaknak vanlawng H-6U pawl zong an i cua len.

China nih US keneh zul in a ralkap thazaang a ser thluahmah cang, liamcia kum tlawmpal in Rili Ralkap le Vanlawng Ralkap pawl zong ramleng ah a thlithup in sakhan a sakpiak thluahmah cang hna.

Hriamnam zong a zalh. J-20 ralkap vanlawng hi US ralkap computer an hack i an firmi technology in an sermi asi, tiah bia a leng. Zahan puai ah mah vanlawng 5 cu artlang in an zuang. Mah vanlawng hi tam taktak kan chuah liopi si ti kha an i cua.

US le Japan thiamsang pawl nih ‘China ralkap vanlawng J-20 pawl hi ral an tuk lio hmuh lo ahcun US ta pawl he tahchun a har ngai. Hi bantuk cu a seh ṭhawn hi a biapi ngaimi si’ an ti.

Zahan an piahmi hriamnam lakah a thawng nakin let 5 a rang deuhmi DF-17 missile pawl zong an i tel. Mah pawl hi cu a ran tuk caah le a duh paoh in lam aa thlen khawh caah US missile khamnak a hrial khawh lai. Chanthar raltuk ning cu China nih a thlen cuahmah, ti khawh asi.

Mah bantuk hriamnam hi US le Russia nih ser an i zuam cuahmah lio asi, nain China nih a lonh cang hna tiah thiamsang pawl nih an zumh.

China nih minung cit lomi ralkap vanlawng hme (drone) pawl zong a piah. US nih mah bantuk hin ralhrang pawl a kah lengmang hna. Mah lei zongah China nih US phak aa zuam. Ralkap bang a za le a thongin a bubu pi in raltuknak drone thlah khawh ding tiang aa zuam.

Zahan a piahmi lakah ral pa a signal hrawhpiaknak mawtaw pawl le dik takin rili ralkap tilawng kahnak ‘carrier killer’ missile pawl zong an i tel.

Hiti ning te cun China hi raltu sual sehlaw US nih a rili ralkap tilawng in a kalhnawh ngam theng lai lo. China nih puak viar in a kah khawh cang lai.

Atu lio vawlei cung chawleh ṭhawngbik le ralkap hriamnam le thazaang ṭhawngbik cu US asi rih ko nain China nih a phanh thluahmah cang. China nih kutcaang khiah in US pennak dongh ni a rel cang.

Zohchihmi: Reuters le Nikkei Asian

- Advertisement -

Ṭial Tharmi

Tuni ah ralkap nih minung 2 meithal in an kah hna

Tuni Zarhpini ah, Mandalay ramṭhen Myingyan khua ah tlangval pakhat cu ralhrang Myanmar ralkap nih meithal in an kah caah a nunnak caah thinphan...

Sihni Salai Dawt Cung Lian inn ah gas a puak i a nunnak liam

Sihni Salai Dawt Cung Lian cu an inn ah gas a puak i a nunnak liam tiah kan theih. An nih hi Mandalay ah ralkap...

Yangon ah bomb a puak i ralkap 3 hliam tong

Nizaan ahkhan Yangon ah bomb tam ngai a puak i ralhrang Myanmar ralkap a tlawmbik 3 paoh hliam an tong, tiah The Irrawaddy media...
- Advertisement -

Bill Gates nih ‘mah 3’ a thiammi hi cu hmailei ah rian tha an hmu kho lai ati

Vawlei cung mirumbik 4nak a simi Bill Gates cu hmailei kong lawngte ah a buai khim ko. Thil thar sertu le sipuaizi thlengtu pawl he...

Apoi tuk: Min Aung Hlaing cu ASEAN Meeting a kai lai

Uknak firtu Myanmar ralkap bawizik Min Aung Hlaing cu April 24 ah tuah ding ASEAN meeting ah an sawm ve caah Indonesia a tlawng...

Subscribe to Youtube

The Chin Express cu kan Chin mipi caah free tein ni fatin thawngpang dik thanh aa zuam pengmi kan si. Kan video hmuh na duh ahcun kan Youtube channel ah 'Subscribe' tuah ve.

- Advertisement -
- Advertisement -