Chinland FC nih Chiland for Paletwa Program [II] tlangtar in Paletwa peng ah a ummi ralzaam hna caah avoi 2nk tangka bawmhnak a pek.
Bawmhnak tangka cu August 3 ah an pek tiah kan theih.
Ralzaam mipi hna nih an herhhai cawkzalhnak ca ah tiin Chinland FC nih Paletwa peng ah a ummi chungkhar 67 cu chungkhar 1 ah ting 1 cio in bawmhnak a pek hna. Bawmhnak a pekmi zate MMKs 6,700,000 a si.
Chinland for Paletwa program cawlcanghnak ah a tlamtlinnak hnga khua chungah khuami rianttuantu an thiah hna i cutin inn kip an bawmhnak cu an va pek hna.
Chinland for Paletwa program ahhin Chinland FC ngeitu nih tangka aa thawh hmasa i ramchung, ramleng in mi bawmtu pawl nih an thawhmi tangka pawl he a herhnak hmun pawl ah bawmhnak an pek hna.
Avoi 1nk bik program cu Chinland for Tedim in si i Tedim sizung pi ah bawmhnak an pek. Hi hnu zong ah avoi 3nk bawmhnak pek an tim rih tiah kan theih.
July 3 zong ahkhan Chinland FC nih Yangon Region, Hmawbi khua ah a ummi Paletwa peng ralzaam pawl sinah facang tun (70), chiti, piat, hand sanitizer dur (35), sianginn kainak cauk dozen (56), longyi (35), hni (35), bawlpen, khedan le sianginn hman awk thilri pawl a bawmh cang hna.
