Kalaymyo, Monlai sang ah kum 9 faphir ttafar hna cu an pa ei nih a tlaih hrem hna tiah kan theih.
An paei kum 32, Pu Lalhmuliana nih a nupi fale ttafar hna cu a nupi um lo kar 2019 thokin a tlaihhrem lengmang hna.
“Tu kum July thla chung lawngah cu kong cu kan theih i palek sakhan ah report kan tuah,” tiah mah kong a tawlreltu Dingdi Nubu in Pi Malsawmi nih a chim.
“A paei nih ttafar hna a tlaihhrem hna hi a sau tuk cang. Ngakchia nih a caan an chim kho lo. An nu hi mi inn ah thiam a takmi a si.
“Ttafar hna cu ngakchia sining bang bia an i al lio ah ka pa nih cutin an ti kha tiin an chimmi kha an pate nih a theih. An pate nih ttha tein bia a hal hna tikah an pa ei nih an pahnih in a tlaihhrem hna cu an theih,” tiah Pi Malsawmi nih a chimchap.
Mah konghe pehtlai in Dingdi Chin Nubu le Upper Chindwin Youth Network bawmhnak in ttafar hna i an nu nih July 14 ah Kalaymyo palek sakhan ah report a tuah.
A zaami ngakchia tlaihhremtu Pu Lalhmuliana cu July 15 ah Tamu peng, Khampat khua ah an tlaih khawh.
Pu Lalhmuliana cu Kalaymyo palek sakhan nih Sualnak Upadi Dal 377 in case a tuahpiak. – Khonumthung
