Miphun Tling Rampumpi Duhlo Langhternak Kawmiṭi (GSCN) nih Chin Miphun Ralkap (CNF) telh in hriamtlai phu 16 cu “vengtu ngeilo sandahpiahtu mipi veng hna uh” tiah a nawl hna.
GSCN nih mipi veng dingin a nawlmi hriamtlai phu 16 hna cu;
- Arakan Army (AA)
- All Burma Students’ Democratic Front (ABSD)
- Arakan Liberation Party (ALP)
- Chin National Front (CNF)
- Democratic Karen Benevolent Army (BKBA-5)
- Kachin Independence Army (KIA)
- Karen National Union (KNU)
- Karenni National Progressive Party (KNPP)
- National Socialist Council of Nagaland-Khaplang (NSCN-K)
- Myanmar National Democratic Alliance Army (MNDAA)
- New Mon State Party (NMSP)
- Pa-O National Liberation Organisation (PNLO)
- Restoration Council of Shan State/Shan State Army (RCSS/SSA)
- Ta’ang National Army (TNA) le
- United Wa State Army (UWSA) hna an si.
Miphun hriamtlai phu (EAOs) pawl cu rammi dihlak tlukruannak, state/region mahte khuakhan lairelnak le mipi hrem donghternak caah kum tampi chung nunnak pek in ral a domi nan si i atutiang raldo in mipi a vengtu nan si ti kan theih i nan cungah kan i lawm tuk, tiah GSCN nih hriamtlai phu cungah lunglawmhnak bia a chim.
Myanmar ram luatnak caah hremuknak a hram bongh dingin tlangcungmi vialte le nelrawnmi vialte kan lung aa rak rual bantukin, nihin zongah hremuktu ralkap a hram bongh dingin tlangcungmi le nelrawnmi vialte tuanbia ah a hmun ding tiangin kan i lungrual ṭhan a herh tuk hringhran.
Ralkap nih mipi uknak a kan chuh thokin, thlennak caah mipi nih buai lo tein sandah an piah peng, nain ralkap nih buainak phunphun hmang in a ṭhek hna caah mipi hi vengtu an ngei ti lo. Nunnak thap in thawngpang a kan lakpiaktu minung 10 zong an tlaih i thong an thlak cang hna, hremuktu ralkap nih hriamnam ngei lo rammi 400 leng chiakha tukin a thah hna i aruang um loin 3,000 leng a tlaih cang hna.
Cucaah, ralkap sal si duh lo ruangah duhlonak a langhtertu hriamnam ngei lo mipi; mino, nu, ngakchia le tar hna hi miphun dihlak hriamtlai phu pawl nih nan ven hna nak lai fak piin kan in nawl hna, ati.
Atanglei hmanthlak ah tling tein rel khawh asi.
