Hakha peng CNLD aa thleng tharmi: Independent in Hakha peng Pyithu Hluttaw MP cuh aa timmi Pu Ngun Maung cu CNLD party in aa cuh ṭhan lai.
Pu Ngun Maung cu Hakha peng CNLD EC nih Pyithu Hluttaw MP i cuh dingin an thim lo caah CNLD party in a chuak i independent in cuh aa rak timmi si.
Pu Ngun Maung nih, “Party in na chuah a si ahcun Independent in i zuam ko sawh, mah lo cun chuak hlah tiah CNLD nih an ka ti caah thatho tein ka cohlan hna i teinak ka hmuh a si ahcun Parliament ah CNLD le Chin miphun kut le ke ka si tthiam lai,” tiah Teirial Catialtu sinah July 23 ah a chim.
Sinain, ruah lo piin CNLD party ah Pyithu Hluttaw MP hmun a lawn caah a chuah tak cangmi a kir hnawh ṭhan hi si.
CNLD in Hakha peng Amyotha Hluttaw No.12 MP cuh aa timmi Pu San Tin Mang cu pensen thla 4 a hmuhmi a dih rih lo caah Thimnak Zung (Election Commission) nih MP cuh a onh lo.
Mah ruangah, CNLD in Pyithu Hluttaw MP cuh aa timmi Saya Robin Zaathang kha amah ai ah a lut lai, i Saya Robin Zaathang hmunhma ah Pu Ngun Maung a lut lai.
Saya Robin Zaathang cu CNLD nih a herhnak paoh ah a ṭhial nain al lo tein a cohlan i upat a um ngai.
