COVID-19 pulrai ruangah Hong Kong khua sianginn vialte an rak khar dih, zawtnak kan kham khawh cang tiin an on ṭhan hnu ah atu an khar ṭhan hna lai.
Hong Kong Fimcawnnak Vuanci Kevin Yeung nih, “kan khua ah COVID-19 zawtnak a karh tuk caah sianginn kan khar ṭhan dih lai,” tiah thawng a thanh.
“Nikhatni in sianginn vialte khar dih dingin cozah nih nawl kan chuah cang,” ati.
Hong Kong khua ah Nilini ahkhan mizaw thar 34 an hmuh hna. Liamchia thla 3 chung ni fatin hmuhmi lakah a tambik si.
“Kan siangngakchia le khuami ngandamnak caah atu bantukin sianginn vialte khar dih dingin cozah nih nawl kan chuah hi si.”
“Camipuai a phi ding pawl cu phit ter an si ko lai, nain mask an i hruk dih lai i khat le khat hlat pi in an um lai,” ati.
COVID-19 pulrai aa thokka January ah sianginn vialte an rak khar dih hna. Zawtnak a zor deuh caah May thla in an on ṭhan hna.
Nain, liamcia ni tlawmpal chung ah zawtnak a karh tuk caah atu khar ṭhan an timh hna hi si.
Tar zohkhenhnak inn zongah mizaw thar 32 bak an hmuh hna. Liamcia ni 5 chungah zawtnak aa kumi mizaw 12 lebang cu khuazei in dah an i ku ti an hngalh khawh lo caah cozah a lungrethei khun.
Nilini ah cozah nih mibu um zong ri a khiah. A tambik minung 8 lawng restaurant ṭhut ṭi khawh asi. Bar, pub le nightclub ahcun minung 4 lawng ṭhut ṭi khawh asi. — AFP
