Malaysia Covid-19 zawtnak doh bawmh dingin China ram in sibawi thiamsang 8 cu tuni ahkhan Kuala Lumpur an phan.
China Ngandamnak Zung nih Malaysia ah Covid-19 zawtnak doh bawmtu dingah Guangdong Province in sibawi thiam sang 8 a thim hna. Anmah pawl cu respirology, intensive care, psychiatry, infectious diseases, data analysis, virology le traditional Chinese medicine lei thiamsang an si hna.
“Anmah chung in Hubei Province (coronavirus aa thoknak) ah Covid-19 doh ah a kalmi an um,” tiah Malaysia um China tanzung palai Bai Tian nih a chim.
China sibawi thiamsang 8 cu tu chun ahkhan KL International Airport (KLIA) an phan i Bai Tian le Malaysia Ngandamnak Vuanci Zung rianttuan nih an va don hna.
China sibawi 8 cu Malaysia ram ah zarh 2 chung an cam lai i an thiamnak hrawmh dingin Sabah le Sarawak state zongah an tlawng lai.
“Ngandamnak Vuanci Zung le Malaysia ram pumpi sibawi/nurse te nih hlawknak an hmuh lai ti ruahchannak kan ngei. Malaysia nih Covid-19 a doh ning hi kan zumh tuk i a rauh hlan ah a tei lai ti zong kan zumh,” tiah Bai Tian nih a chim.
Malaysia Ngandamnak Vuanci Zung nih nizaan chun in tu chun tiang, ni 1 chungah Covid-19 mizaw 135 an dam i sizung in kan ṭinter hna, tiah thawng a thanh.
A dam i sizung in ṭintermi dihlak 3,102 an si cang.
Mah lio cun, mizaw thar 54 an hmuh hna.
Voi dang cun ni 1 ah mizaw thar 100 leng peng an hmuh nain, tu zarh cu an zor ngai cang. Tutan hi 100 an tlin lo voi 3nak asi cang.
