David Lai nih ral ruangah Mindat Sizung ah aa thlopmi hliam tong ralzaam hna cu tu zingka ah pumpak in a va ton hna i bawmhnak a pek hna, tiah kan theih.
March 14 ah Kawl Ralkap nih Chin khuate ah bomb a thlak ruangah Chinmi 11 an thi i adang 8 hliam an tong. Hliam tongmi pawl cu Mindat Sizung ah an i thlop.
David Lai nih, “atu lio ral ruangah hliam tongmi mipi cheukhat cu Mindat Sizung ah an i thlop. Ka sin um tangka tlawmpal ka pek hna nain, tangka bawmhnak an herh tuk rih hringhran,” tiah sizung ah thil sining a hmuhmi kong a chim.
David Lai cu semnak Lairam ral ruangah hliam tongmi le ralzaam hna pumpak in bawmhnak le thazaang pe dingin Yangon in aa thawh.
Rev. Uk Ling Thang le Paletwa peng MP Myo Hteik nih an zulh i nizaan ah Mindat an phan.
Tuni hi Sami khua lei ah an kal lio asi. Sami khua ah ralzaam 2,000 hrawng an um. Thaizing hi Matupi Sizung ah aa thlopmi ralzaam pawl bawmhnak le thazaang a va pek rih hna lai.
David Lai nih, “April 9 ah Yangon in kan i thawh. Paletwa peng ralzaam hna nih ka ruahnak lengpi in bawmhnak an rak herhmi ka hmuh tikah, bawmhnak tam deuh rak hmuhpiak hna ning law ṭha tuk hnga ti lawngte ka ruat,” tiah The Chin Express ah a chim.
“Liamcia zarh 2 chung ahkhan, MP Stephen Myo Hteik le Suzan bawmhnak in ting 45 man sii ka cawk khawh.
“Tangka a taangmi cu bawmtu committee sinah ka pek lai,” ati.
David Lai cu Paletwa peng kan unau hna tuarnak kong a rel i hmanthlak a hmuh lengmang tikah a siaherh tuk i, guitar i put in Yangon lamkam ah hlasa in bawmh a halpiak hna. Bawmhnak tangka ting 100 leng a hmuhpiak hna i amah pumpak in a va pek hna hi si.
“Keimah sinah Paletwa ralzaam bawmhnak a petu dihlak cungah kaa lawm tuk,” tiah The Chin Express sin in lunglawmhnak a langhter.
