Myanmar Idol Season 4 winner Esther Dawt Chin Sung nih Magway ṭaing ah ‘Pani Sone Asho Baptist Church’ saknak a hlut hna.
Mah kong cu Esther nih, “Pathian nih thluachuah aa ka pekmi chungin mi ka bawmh khawhmi kongte nan sinah hrawmh kan duh hna, ka porhlawt asi hrim lo,” ati.
“Pani Sone biakinn te hi ka pa Korea a um lio tein mission pakhat ah an i tlaih i sak an rak thokmi asi.
“Keimah pumpak zong ka phan bal. Ka phak lio cun a cungcih le ṭuangphah lawng an sak khawh. Mah bu cun hlunghlai taktak in an i pum.
“Kum caan tlawmpal hnu ah keimah zong Chin Idol ah ka zuam i Pathian dawtnak thawngin winner ka ngah tikah Pani Sone Biakinn saknak caah hlut ka duh tuk. Ka nulepa zong ka chimh hna i ka pale zong nih ka fa a ṭha ko, a tlawmtam a biapi lo tiin tha an ka pek i ka si khawh tawk te ka rak hlut.
“2019 zongah Myanmar Idol ka zuam tiakah interview ah an ka hal fatin ka nu si thlopnak caah, Pani Sone Biakinn caah le ngakṭah caah hlut ka duh ti peng.
“Harnak tampi lakah pakhatnak ah Pathian dawtnak, pahnihnak ah chunngkhar thapeknak le thlacam piaknak le pathumnak ah ramchung ramleng in dawtu le thapetu hna thawngin winner ka ngah ṭhan tikah ka nulepa zong si an i thlop kho. Atu cu hmurka si ti loin tuahsernak in tehte ka langhter khawh cang caah Pathian ka thangṭhat.
“Amen, Amen, Amen.
“Pani Sone Biakinn te an kauh lio,” tiin hmanthlak a tar hna.
