Khuami nih “vawlei cung ci ṭha bik nu” tiin an auhmi Uganda nu cu sibawi nih fa ngeih an khap, tiah Australia tadinca 7 News nih a thanh.
Pi Mariam Nabatanzi cu fa 44 a hring cang. A hrinmi lakah – fa 2 phir set 4, fa 3 phir set 5 le fa 4 phir set 5 zong an i tel.
Kum 12 asi lio ah nupi caah zuar a rak tong. A hmai kum ah avoi 1nk bik fa pakhat a hrin.
A vapa nih a kaltakmi nuhmei nu Pi Mariam cu a nung rihmi a fale 38 cawmnak caah rian phunphun a ṭuan, tiah Alja Zeera nih biatak video (documentary) tawite a thlakmi zoh in theih asi.
Atang i Alja Zeera video ahhin cun fa 42 a ngei.. an ti. 2019 April thla ah an rak tarmi asi. Australia tadinca 7 News nih 2019 October 17 ah “fa 44 a ngei…” ati.
A fale cawmnaknak caah thilṭhit rian zong a ṭuan, sammeh le kokek-sii hman rian hna zong a ṭuan.
“Zei dang vialte nakin, ka fale hi cathiam hna seh ti ka duh,” tiah a chim.
“Ka fale sianginn kai hna seh ti hi ka saduhthah asi. Zeihmanh an ngeih lo zongah apoi lo, nain sianginn cu an kai hrim hau,” tiah a chim.
Fahrin-tertu sibawi Dr. Chales Kiggundu nih, “Nabatanzi hi aci (abaw) tamtuk caah hi zatzat nau a pawinak si. Abaw tamtuk mi cu abaw tlawmmi nakin faphir, fa 3 phir, fa 4 phir, tbk., an pawi kho deuh.
“Nu cheukhat cu thla thokka ah an ci/baw (egg) 10 in 12 kar aa sem. Mah zat an ci lak ahcun cheukhat cu nau pakhat leng an semter (pawiter) khawh,” tiah a chim.
Pi Nabatanzi cu liamcia caan ah nau ngeih ti lo dingin aa rak zuam len. Voi 18nak fa a hrin ka ah nau pawi ti lo dingin IUD zong a rak hman. Nain aa rak ziak lo tuk caah lungfim loin a rak um.
