Facebook company nih, “Australia media vialte Facebook le Instagram ah thawngpang/news post kho lo dingin ka block dih hna lai,” tiah Australia Hluttaw ah a chim.
“Facebook le Google company nih Australia media pawl hi nan website ah news an post man tangka nan pek hna lai …,” tiin Australia cozah nih upadi ser a timh caah atu bantukin Facebook company nih a tlerh hi si.
Facebook Asia-Pacific Vice President Simon Milner nih, “mah upadi hi nan fehter ahcun Australia media vialte hi Facebook le Instagram ah news post kho lo dingin kan block dih hna lai,” tiah Nithumni ahkhan Hluttaw ah a chim.
“Mah upadi hi a nun ahcun Facebook le Instagram ah Australia news umter hi kan caah a phu ding si lo. Australia news vialte block dih hi kan duhmi asi lo nain thim awk dang kan ngei ti lo,” ati.
Australia cozah nih, “Facebook le Google ah news a langh thawngin tangka tampi nan hmuh, cucaah news ngeitu media pawl hi tangka nan pek ve hna lai. Cun, Google le Facebook kawlnak kanan (search algorithm) thlen nan timh fatin nan thlen ning kha cuṭin in nan chimh hna lai … ” ati.
Mah upadi hran cu tu kum dongh hlan ah nunter a duh. Australia media pawl cu an i lawm ngai.
Nain, Facebook le Google nih cun “mah bantuk upadi cu zulh thiam ding asi lo” tiin an doh peng.
Google company nih, “mah upadi hi a nun ahcun Australia ummi caah Google ah duhmi kawl/hmuh a har tuk lai. Cun, search algorithm kan chimh dih hna i user data kan pek dih hna ahcun mipi privacy caah ṭihnung asi,” ati.
