Myanmar ramtthen le state kip in peng pakhat cio nih Covid-19 theihtlei “ကျန်းမာပျော်ရွှင် ပညာသင် ကြိုတင်တားဆီး COVID-19” tlangtar in video tawi thlak zuamnak a um.
Hi zuamnak cu 2020-2021 fimcawn kum ah Myanmar ram chung um sianginn pawl ah ningcang tein Covid-19 zawtnak an i ven khawhnak hnga tiin Fimcawnnak Vuanci Zung, Ngandamnak le Zaanglek Vuanci Zung le Soe Electric Foundation i bawm in an tuahmi a si.
Chin state aiawh in Falam khua in aa zuammi pawl nih video thlak cu an lim cang tiah kan theih.
Falam peng fimcawnnak lutlai Pi Ngun Pen nih,”ramtthen le state 14 ah state le ramtthen pakhat cio in zuamnak ah an i tel lai. July 10 ah video cu Naypyidaw ah director thiamsang pawl nih an zoh lai i bia an khiah lai. Chin state aiawh in Falam aa zuam lai. A tthabik in an i zuam ko,” tiah a chim.
Chin state aiawh in Falam peng fimcawnnak lutlai hruainak in July 14 ah Covid-19 theihtlei video thlak cu an thok i atu hi an lim cang.
“Video cu minutes 5 in 10 kar a saumi a si. A dang state pawl ahcun an state peng kip sianginn dihlak ngawt ah video an i thla, mah chungah a tthabikmi kha zuamnak ca ah an hman.
“Kan nih Chin state cu peng dang pawl nih an tuah khawh lo caah Chin state cozah nih Falam khua in kan zuampiak ko tiah a ka fial. Cucaah, kan tuah hi a si i state aiawh ah a cang,” tiah Pi Ngun Pen nih a chimchap.
“ကျန်းမာပျော်ရွှင် ပညာသင် ကြိုတင်တားဆီး COVID-19” theihtlei video thlak zuamnak ah laksawng a hmumi pawl cu July 17 ah Naypyidaw ah laksawng pek an si lai. – Chin World
