Germany ram nitlaklei ah apartment chungah ngakchia ruak 5 an hmuh. Thil a can hi Nilini ahkhan a si.
Ngakchia 5 cu hringtu an nu nih a thahmi hna a si tiah palek nih an chim.
Ngakchia 5 ruak cu North Rhine-Westphalia state i Solingen khua ah a ummi private apartment chung ah kan hmuh hna tiah palek nih an chim.
Ngakchia 5 cu kum 1, kum 2, kum 3, kum 6 le kum 8 an si hna tiah Germanny thawngzamhca Bild nih a langhter.
Hringtu nu cu a fale 5 a thah hna hnu ah amah le mah thah aa tim ve i tlanglawng hmai ah a zuang nain a thi lo, fak tukin aa hliam. Atu hi palek nih an cawngh.
Ngakchia hna i an pi nih a fanu (kum 27) nih a fale 5 a thah hnanak kong le a fapa upabik (kum 11) i ruaih in amah le mah thah aa timhnak kong cu palek sinah thawng a thanh hna.
Minu a fapa kum 11, cu a hnu ah him tein an hmuh tthan.
A hnu ah hringtu nu cu 35km hrawng a hlatnak Duesseldorf tlanglawng station ah a kal i tlanglawng hmai ah a zuang.
Hringtu nu cu tlanglawng lam 2 kar ah an char i sizung ah an kalpi. Thilsining cu palek nih an hlat liopi a si. – AFP
