Chin khualipi Hakha ah phun ding Ralbawi Aung San dar milem cu a phan cang nain phunnak ding hmun taktak a um rih lo, tiah Chin Hlutdaw hruaitu Pu Zo Bawi nih a chim.
“Hmun kan kawl lio si, hmun kan ngah rih lo. Hmun lawng pahnih-thum hrawng cu kan timh nain bia kan khiak rih lo. Ralbawi dar milem cu hlan zongah phun a rak si cang, hlan ah Sipin hmun chung ah phun a rak si, hlan i phunmi cu concrete in tuahmi si caah an tthial ttukttaknak ah a tteoh len caah a thar kan in tuahpiak hna lai tiin a thar a kan tuahpiakmi si,” tiah Pu Zo Bawi nih a chim.
“Atu a thar an tuahmi Ralbawi Aung San dar milem cu Chin state Hlutdaw zung concrete a kan phah piakmi company nih tangka ting 200 dih in a ser i a kan hlutmi si,” tiah a chimchap.
Hakha khuapi ah phun an timhmi Ralbawi dar milem kong he pehtlai in, Chin Zatlang Bu rianttuan Racob Thang nih, “dar milem phun cu luatnak he aa pehtlaimi si caah Chin luatnak hruaitu hna milem pawl zong an phun chih ve ahcun buainak a tlawm deuh hnga,” tiah a chim.
“Committee an dirh hlan tein, ‘Ralbawi dar milem phunnak caah hlutu an um, luatnak lungdonh zong kan phun lai’ tiin meeting an rak auh i kai tel ve.
“Ralbawi cu luatnak hruaitu zong asi caah luatnak he aa pehtlaimi sikaw, Chin luatnak hruaitu 3, ahlei in Panglong Sachoh ah minsen a rak thumi 3 hna i an milem he milem 4 phun ulaw cu buainak um hnga lo. Minung 1 milem lawng nan phun ahcun ramkhel he aa pehtlaimi si caah harnak nan tong te lai, ka rak ti hna i an lung a rak tling dih bal,” tiah Jacob Thang nih a chim.
Chin state Thantlang khua zongah, Ralbawi dar milem phun cu mipi nih an rak doh caah an leet tthan. — Khonumthung
