- Hakha College ah engineer le computer subject mark an ṭhumh lai
- Atu hi Siangngakchia 700 leng an um
- Hmai kum cun degree peknak an tuah ve cang lai
- Wifi an ngei lo
Hakha College ah tu kum December in cawn thok ding engineer le computer subject a soktu an tlawm caah mark ṭhumh in siangngakchia kan auh ṭhan lai, tiah Hakha College sianguk Dr. Lian Za Khup sin in kan theih.
Engineer subject cu urban, electricity, industry, electronics tiin major 4 ah kan ṭhen i major pakhat ah siangngakchia 30 cio cohlan kan timh. Nain atutiang ah, major 4 a soktu dihlak 29 lawng an si. Engineer subject cu mark 380 cungin kan rak lak nain atu cu mark 360 cunglei paoh kan cohlan cang lai, tiah a chim.
Computer subject cu atutiang ah a soktu 1 lawng um. Mah subject hi hmasa cun mark 340 cunglei a ngahmi siangngakchia lawng kan cohlan hna nain atu cu mark 320 cung a ngahmi paoh kan cohlan hna lai, ati.
Dr. Lian Za Khup nih, “cohlanmi siangngakchia cazin cu tu thla 25 ah kan thanh lai. Mah hnu zongah sok a ngah ṭhiam. Hmasa sianginn luh soknak ahkhan aa rak tel lo caah an hngal lo. Mark ṭhumhmi cu kan state chungin Tanghra a aungmi ca lawngah si. State/region dang in Tanghra a awngmi cu hmasa mark ning ṭhiam si ko lai,” tiah a chim.
“Arts le science course pawl cu hnu i university kan ngah tikah subject dihlak a chimmi university bantukin kan chimh ve te hna lai.
“Atu kan auhmi science courses pawl hi cu kum 6 an kai hnu ah B.E degree kan pek hna lai. Hakha GTI ah a kaimi zong ka hin peh khawh an si,” tiah a chim.
Law subject zong siangngakchia 50 an cohlan nain a soktu 27 lawng an um rih.
“Hakha College ah a herhmi thilri a tam tuk. Sianginn dang ahcun sianginn area chungah free wifi an ngah nain kan sianginn cun a ngah rih lo. Certual zong ngeih kan duh.
“Siangngakchia umnak inn an sakmi cu a rauh hlan ah an lim lai. Degree peknak inn nganpi saknak caah budget kan ngah cang i a rauh hlan ah sak an thok lai,” tiah Dr. Lian Za Khup nih a chim.
Hakha College ah atu lio an chimhmi hna subjects pawl cu; Myanmar, English, History, Chemistry, Physics, Mathematic, Zoology le Botany hna an si.
Kum 1nk in kum 3nk tiang a kai liomi siangngakchia 735 an um.
2021-22 Cacawn Kum ahcun avoi 1nk bik degree peknak tuah kho dingin timhtuahnak an ngei.
Hakha College cu 2017 November 9 ah an on i Hakha in Thantlang lei kalnak lam kam ah a um. Atu lio hi cachimtu 47 an um i rianttuan vuanṭhan 85 an si.
Charhchan: Zalen
