Chin khualipi Hakha um Vum Thu Maung Certual i puai zohtu mipi ṭhutnak cu Chin State Cozah budget ting thong 6 le 336 (633.6 million) dih dingin an sak cuahmah lio asi.
Kum 1998 July 22 ah Siangngakchia Lentecelh Puai tuahnak caah an rak sakmi Vum Thu Maung Certual puai zohtu ṭhutnak cu a rop tuk cang caah an ṭheh dih in a thar in an sak hi si.
Tuni tiangah acheu dengmang (45%) an sak cang. Tu kum September thla dongh ah an lim lai, tiah Chin State Zaanglek le Kaayiah Zung hruaitu U Than Aung nih a chim.
Puai zohnak hnulei, thlanglei le chaklei ah pe 400 sau, pe 45 sang, dot 18 in thir le concrete (reinforced concrete = RC) in an sak, tiah U Than Aung nih a chim.
Puai zotu ṭhutnak cu Rung Family Co., Ltd. nih January 27 in sak hram a thok i September 30 ah lim ding asi.
Quality ṭha tein a sak khawhnak hnga le caan khiahpiakmi chungah a lim khawhnak hnga Rung Family Co., Ltd. nih felfai tein aa zuam pinah State Zaanglek le Kaayiah Zung ṭuanvo ngeitu zong nih ni fatin an vehvat peng hna.
