Hpakant ah vawlei a minh cu kan ram caah ngaichia tuk thil pakhat a si, tiah Pi Aung San Suu Kyi nih tu zingka online biaruahnak ah a chim.
Tuchun sml 12 tiang ah miruak 167 an hmuh cang. Hliam tongmi minung 48 an si. Atu zong mibawmtu nih an kawl cuahmah hna lio a si.
July 2 zinglei ah a cangmi Kachin state, Hpakant vawlei minh cu kan ram caah ngaichia tuk thil pakhat a si, tiah Pi Aung San Suu Kyi nih tu zingka ah a chim.
Mi tampi cu pawcawmnak caah lungvar kawl ah Hpakant ah an kal hna.
“Hpakant ah a cangmi hi kan ram caah ngaichia tuk thil pakhat a si. Kan ram sifah he aa pehtlaimi a si. Phungning tein rianttuan awk a har tuk caah atu bantuk in pawcawmnak caah phungninglo in lungvar an kawl hi a si,” tiah Pi Suu nih a chim.
Nizaan ah a cangmi Hpakant vawlei minh cu cu hlan a cangmi vawlei min vialte lakah mithi le mitlau an tambik.
“Thil cu a cang ko cang i, a thimi hna ca tu ah a tthabik in kan tawlrelpiak hna lai. Atu bantuk fur caan ahcun lunghring cawhnak hmun cu ttih a nun tuk caah company pawl hmanh rian an ngol.
“Lungvar kawltu pawl cu lungvar pakhat te tel kan i hmuh hnga maw timi ruahchannak he ruah sur le ttihnung lak ah lungvar an kawl. Ruah lo tukmi thil a can tikah lungvar kawl tamtuk an thi,” tiah Hpakant peng MP U Dashi Lah Sai nih a chim.
Vawlei minhnak in a thimi le aa hliammi pawl cu Mon state cozah nih tangka Kyats ting 500, Myanmar Gems & Jewellery Entrepreneurs Association nih ting 500, Kawl ralkap nih ting 500 le a dang mibawmtu pawl nih tangka an hlut hna. – Duwun
