India ram nitlak lei ah dot 3 inn pakhat a cim i minung 10 an thi, a dang minung 25 leng a chungah an i tap tiah cozah nih thawng a thanh.
Thil a cannak hi Bhiwandi khuapi ah a si i, Nikhatni zaanttim 3.40am ah inn cu a cim.
“Minung 10 an thi. Atu tiang ah minung 11 kan khamh khawh cang hna” tiah nawl ngeitu nih an thanh.
Kokek Ral Mibawmtu telin emergency mibawmtu 40 leng cu thil a cannak hmun ah an phan i aa tapmi chanh dingin an kawl hna.
Kokek Ral Mibawmhnak Zung director-general Satya Narayan Pradhan nih, “Inn cimhnak in a chung ah aa tapmi minung 20-25 hrawng khamh ding ah rimhnimh thiam uico le thilri pawl i hmang in an kawl cuahmah hna lio a si” tiah Twitter ah a ttial.
Inn a cimhnak a ruang cu atu tiang an hngal rih lo. Nain, India ram ahhin June in September thla kar ah inn a cim pah lengmang tawn. – AFP
