India ram thlanglei ah va a ngeika nu le a dang an chungkhar minung 3 cu tihrah pin ngaimi tiva chungah selfie thlak an timh lio ah ti nih a fenh hna i an thi tiah palek nih an chim.
Minung 6 simi chungkhar cu selfie thla dingin ti thuhnak hmun ah kut tlaih buin an dir hna. Mah lio ahcun minu pakhat cu a nal i tiva thuhnak chung ah ruah lo piin a tla, midang a dawh chih hna.
Minu a vapa nih midang nu pakhat khamh a timh nain a nupi telhin kum 14 ngakchia pate ti ah an tla i an thi.
Social media nih a lemmi mino pawl cu online tar awk hmanthlak ruah ah an himnak ding tuak loin hman an i thla tawn i tihnung tuk tiah thiamsang nih an ti.
Tu kum May thla zong ahkhan India ram, Haryana state ah tleirawl 3 cu tlanglawng lam cungah selfie an i thla i tlanglawng nih thi lakin a rak pah hna.
2017 zong ahkhan Karnataka state chaklei ah siangngakchia 3 cu tlanglawng hlei cung i selfie an i thlak lio ah tlanglawng nih thi lak in a rak pah hna.
Nikum ahkhan All Indian Institute of Medical Sciences nih India ram pumpi ah kherhlainak a tuah i 2011 in 2017 kar ah selfie thlak lio ah a thimi minung 259 an si a ti.
Vawlei cung selfie thlaknak in a thimi tambik hi India a si. Mah hnu ah Russia, US le Pakistan an si. – NST
