“Indonesia ramlak meikang ruangah a chuakmi thlithur nih ngakchia 10 million dengmang thinphang in a chiah hna” tiah UN nih September 24 ah cathluan a chuah.
Scientists nih ramlak meikang nih hin carbon dioxide tamtuk a chuahter an ti.
Ramlak meikang in a chuakmi meikhu thalo nih naihrawng cu Southeast Asia ram vialte a thuam dih i minung ngandamnak caah a that lo ruangah sianginn le airport tiang an khar hna.
Minung tampi cu hmai huh an i cawk hna. Cheukhat cu sizung tiang an phan.
Indonesia cozah nih a ram chung i cinthlaknak hmun ah mei duahmi hmih dingin vanlawng in meithattu thong tampi a thlah hna. Indonesia ram ah kum fatin lothlo pawl nih lo an duah peng nain khua a ro tuk ruangah 2015 thok in mei a lawn chin lengmang.
Kum 18 tang ngakchia 10 million dengmang cu meikang a zual tuknak Indonesia ram, Sumatra island le Borneo island ah an um. Cheu 4 ah cheu khat cu kum 5 tang an si tiah UNICEF nih a thanh.
Ngakchia chuak ka cu an pum chungi zawtnak khamtu (immune) a tlawm tuk rih ruangah an zawt fawi. Thlithur ruangah naupawi mi nih fa an hrin tik ah khing tlin lo (weights) le thla tlinglo in nau chuah khawh a si tiah UNICEF nih a ti.
“Indonesia ram ah thli a thur tuk. Kum fatin ngakchia million cu thlithur an dawp i an ngandamnak caah tihnung a si pin ah sianginn tiang an kai lo,” tiah UNICEP rianttuan Debora Comini nih a chim.
Nihnihni in khan Malaysia le Singapore ram ah thlithur a hung zor deuh i van dum zong tlawmpal hmuh khawh a si cang. – CNA
