Minung 4 a simi chungkhar pakhat a that tu kum 40 China pa cu tuni ah Japan cozah nih hri thlai in a thah.
China pa Wei Wei le China rammi a si vemi a hawile 2 nih 2003 ah minung 4 a simi chungkhar pakhat cu an thah hna, tiah Japan media nih an thanh.
Minung 2 cu China ah an zaam hnu ah cuka ah an tlaih hna. Pakhat cu 2005 ah China cozah nih a thah. Adang pakhat cu nun chung thongdan an pek.
G7 chungtel ram 7 lakah Japan le US cozah lawng hi misual thahnak upadi a hmang peng rihmi an si. Japan mipi tam deuh zong nih misual thahnak upadi cu an cohlan.
Japan ram ahcun hri thlai in an thah hna. Thah dingmi pawl cu ‘cu ni (kha ni) ah thah na si lai’ ti an chim cia hna lo. Thah an si ni a zingka lawng ah an chimh hna.
Atu hi thongtla 120 hrawng thah dingin tazacuai an ton lio asi. Ni kum ah minung 15 an thah hna. Liamcia kum 10 chungah tambik an thah hna kum asi. 15 lakah, Tokyo vawlei tang tlanglawng chungah sarin gas in mipi a rak ṭhuatu ‘Aum Shinrikyo kalsual phu’ member 13 an i tel.
2012 in Pu Shinzo Abe nih Prime Minister a ṭuan hnu in tuni tiangah minung 39 an thah cang hna, tuni ah thahmi China pa hi 39nak asi, tiah Upadi Vuanci Zung nih a thanh.
