Tuni ah Japan ram hruaitu Prime Minister Pu Shinzo Abe nih “ka ngandam lo caah Prime Minister rian in kaa phuak lai” tiah thawng a thanh.
Pu Shinzo Abe, kum 65 cu avoi 1nak bik Prime Minister a rak ṭuan lio zongah pawpi phin zawtnak a ngeih caah amah tein aa rak phuak.
“Mah ka zawtnak kha a puan ṭhan caah sizung ah kaa piah lengmang. Punghman tein i piah peng a hauh caah Prime Minister rian ṭuan caan a ngei kho ding ka si ti lo.
“Mipi nih nan ka thimmi rian luhlinh in a ṭuan kho ding ka si ti lo caah, Prime Minister rian hi kaa khinh awk asi ti lo tiin kaa sungphiat,” tiah Pu Shinzo Abe nih a thanh.
Cozah tlaitu Pu Shinzo Abe party Liberal Democratic Party nih amah chaangtu ding an thim khawh hlan cu a ṭuan chung rih ko lai. An party member pawl nih thimnak an tuah colh lai tiah zumh asi.
Aho nih dah a chan lai ti cu atutiang hngalh asi rih lo nain, Tangka Vuanci Pu Taro Aso silole Chief Cabinet Secretary Pu Yoshihide Suga nih a chan te ṭheo lai tiah zumh asi.
Pu Shinzo Abe cu kum 2006 ah Prime Minister a rak ṭuan nain a hmai kum 2007 ah pawpi phin zawtnak a ngeih caah amah tein aa rak phuak.
2012 in Prime Minister a ṭuan ṭhan i tuni ah ka zawtnak a puang tiah amah tein aa phuah ṭhan hi si. Japan ram ah Prime Minister saubik a ṭuanmi si.
“Japan mipi nih Prime Minister ṭuan dingin nan ka thimmi kum 1 aa duh rih pinah COVID-19 pulrai liopi ah atu bantukin ka rian ka chuahtak caah nan dihlak ngaihthiam kaan hal hna,” tiah Pu Shinzo Abe nih mipi a nawl hna. — AFP
