Sagaing ramtthen, Kalaymyo ah Quarantine Center ah a lutmi minung 7 cu zuu an ding i sianginn kutka an hrawh caah ram thilri hrawh case in tazacuai an si.
Upper Chindwin Network in U Kyaw Thet Win nih, “Ttuanvo ngeitu cozah zung he i bawm in khumherh (quarantine) nak kan tawlrel.
“Mah hi an duh rua lo. Cun, Quarantine Center ahhin pumpek in rian a ttuanmi mino zong an um. Quarantine Center ah kan chiah hna tikah an duh ning tein tuah/zulhpiak cu a fawi lo cuta.
“Cozah nawl chuahmi zulh in kan tuahmi a si. Minung 7 cu Kalay University min in tazacuai an si” tiah a chim.
Tazacuaimi hna hi Kalay University ah quarantine lutmi an si i Letpanchaung, Min Hlah, Sanmyo, Pin Taw Oo le Tahan sang in mino pawl an si hna.
“Report an tuah ning ah a thli tein an lut, Quarantine Center ah an aukhuang. Pumpek in rian a ttuanmi le rianttuan pawl hna an hnawh hna tiah kan theih.
“Cozah zung rianttuan le pumpek in a ttuanmi khuami hna nih rampi cozah chuah ning tein an ttuan ding a biapi tuk.
“Cheukhat cu khua chung ah aa thupmi zong an um. Khua chung ah Covid-19 zawtnak ngeih i thih sual ahcun thinphang kan um dih lai ti kan phang.
Cucaah, zatlangbu nih biatak tein tawlrel dingin Sagaing ramtthen cozah sinah kan hal ” tiin U Kyaw Thet Win nih a chimchap.
Atu hi ramdang in a rak tlung/lutmi tam deuh cu Kalay University ah khumherh an si. – Chin World
