Kawlram ah Covid-19 zawtnak in a thimi 2 an i chap i a thimi dihlak 26 an si cang.
Pakhat cu North Okkalapa sizung ah aa thlopmi kum 70 pa (Case-2504) a si i thikai zawtnak ngeimi a si. September 13 zaanlei sml 4pm ah a thi tiah Ngandamnak Vuanci Zung nih thawng a thanh.
A dang pakhat cu Wai Ba Gi sizung ah a ummi kum 72 nu (Case-1987) a si i zunthlum, thikai le lunglei zawtnak ngeimi a si. September 14 zinglei sml 6:30am hrawng ah a thi tiah Ngandamnak Vuanci Zung nih a thanh.
Tu zingka i Ngandamnak Vuanci Zung nih thawng a thanhmi ah Kawlrammi ah Covid-19 zawtnak ngeimi 83 an hmuhchap hna.
Kawlram ah Covid-19 zawtnak ngei hmuhmi dihlak 3,015 an si cang. Cu chungah, 699 cu an dam i sizung in an chuak cang.
Atu lio ah Covid-19 in a zaw liomi mizaw 2,292 an si.
Kawlram chungah Yangon ramtthen ah Covid-19 mizaw an tambik.
