Kawlram ah September 2 ah minung 2,552 an test/check hna i Covid-19 positive 120 an si. Ngandamnak Vuanci Zung nih zahan zaan 8pm le tuzing 8am ah tthip 2 in a thanh cang.
Cucaah, September 3, 2020 chun sml 12 tiangah Kawlram ah Covid-19 zawtnak ngei hmuhmi dihlak 1,058 an si cang.
Atu lio Kawlram chung ah Covid-19 zawtnak ngei tambik an hmuh hnanak hi Rakhine state (466) a si. Pahnihnak ah Yangon ramtthen (443) a si.
Kawlram ah Covid-19 a umka in nihin tiang a dam i sizung in a chuak cangmi 359 an si cang. A thimi 6 an si. Atu hi Covid-19 in a zaw liomi mizaw 693 an si.
Rakhine state chungah Covid-19 mizaw tambik hmuhnak hi Sittwe khuapi a si. Pahnihnak ah Kyaukpyu a si.
September 3 chun tiangah Kyaukpyu ah Covid-19 mizaw 61 an um i an sizung hi mizaw 68 tlum lawng a si caah hinak in an karh rih ahcun mizaw zohkhenhnak cu Kyaukpyu Town Hall hman an timh.
August 16 ahkhan Sittwe khuapi ah a ummi nu pakhat sin ah Covid-19 zawtnak hmasabik an hmuh. Cunu cu July thla dongh lei le August thla thok ka ah Kyaukpyu ah a tlawngmi a si.
August 10 in August 29 tiangah Rakhine state in state dangdang ah a kalmi minung 5,000 leng an si. Ngandamnak Vuanci Zung nih cu pawl cu nawl ngeitu sinah thawngthanh dingin a forhfial hna. Cun, hnarcheu cu phone chawnh khawh an si ti lo ti a si.
