Kawlram ah Covid-19 zawtnak ngeimi hi nikhat ah buaktlak in 200 leng peng hmuh a si i tu hnu zarh 3 tiang zawtnak ngei an karh rih ko lai, tiah Ngandamnak Vuanci Zung nih a ti.
Ngandamnak Vuanci Zung in biachimtu Dr Tan Naing Soe nih, “Tu hnu zarh 3 tiang hi cu Covid-19 mizaw an karh rih ko lai. Mah hi pulrai a si ning tawn a si.
“Khua ngan deuh ah zawtnak ngei an karh deuh lai. Khua ngan deuh ahcun zarh 5, 6 zong a karh kho. Kanmah nih cun zarh 3 tiang kan ruah damh” tiah a chim.
“Atu lio cu zawtnak a karh saling te a si. Hi lio ah zawtnak doh ning zong a tthawng deuh ve lai. Kan i zuam chih ve lai. Hi karlak ah zawtnak ngei a tomtom zong in an um ko lai nain biatak tein kan doh ve lai.
“Covid-19 mizaw cazin cu a kai thluahmah rih ko lai nain biatak tein kan doh ve lai i tlawmpal ahcun an zor tthan ko lai. Mah hi cu pulrai a si ning te a si” tiah Dr Tan Naing Soe nih a chim.
Yangon ramtthen ah Covid-19 mizaw an tambik caah Co Co Island dah ti lo, Yangon ramtthen chung i peng dihlak ah a herh lo ah lengchuah lo ding tiin Ngandamnak Vuanci Zung nih September 20 ah nawl a chuah.
Yangon ramtthen ah Covid-19 mizaw he aa chawnbia lomi le hmun dang ah khual a tlawng bak lomi sinah Covid-19 zawtnak an hmuh ruangah a tubantuk in lengchuah lo ding timi nawl an chuahnak hi a si.
“Yangon bantuk khuapi ahcun pawcawmnak caah ni khat ttuan, ni khat eimi chungkhar an tamtuk. Cun, rianttuanmi pawl zong tlunkal a si tikah lengchuah lo awk ttha lomi an tamtuk.
“Leng an chuah cio hna tikah zawtnak a karh khunnak hi a si. Ramdang zongah khuapi pawl ahcun zawtnak a tam khun. Khua a ngan deuhdeuh, lengchuak minung an tam deuhdeuh ve,” tiah Dr Tan Naing Soe nih a chim.
Kawlram ah September 22 zinglei tiangah Covid-19 zawtnak ngei hmuhmi dihlak 6,471 an si cang. A thimi 100 an si. – Mizzima
