Vawlei cungah Covid-19 mizaw an tambiknak US ram ah kum 2 ngakchia nute nih mask hruk a duh lo ruangah an chungkhar ningin vanlawng cit an sian hna lo.
Brooklyn khuami Chaya Bruck, kum 39 cu Nithumni ah a fale 6 he Orlando in New York ah JetBlue vanlawng in zuan an tim.
Vanlawng cung an kai hnu ah a fa hniang Dina nih mask hruk a duh lo caah an nu Bruck cu vanlawng chung riantuan (flight attendants) pawl nih na fa mask aa hruk duh lo ahcun vanlawng in kan in ttumter hna lai tiah ralrin an pek.
A fale dang pawl zong nih Dina cu mask i hruk dingin an fial len. Cun, Bruck nih flight attendant pawl cu kan umter ko uh tiin a nawl hna.
Dina cu a nu Bruck nih mask a hruk ter lengmang nain a phoih lengmang i a donghnak ahcun an chungkhar ningin vanlawng in an ttumter hna.
JetBlue vanlawng company nih Covid-19 zawtnak karh hlah seh tiin August 10 thok inkhan kum 2 in a cunglei paoh vanlawng aa citmi paoh mask i hruk ding timi nawl a chuah.
Bruck nih “ka fa cu a kut le ke hri in maw ka ttem lai ka ti hna. Vanlawng cit ter an ka duh lo” tiah NBC New York ah a chim.
Bruck le a falei cu a hnu ah United Airlines in an khua ah an tlung kho tthan.
“Kan zawn a kan ruat i a kan theithiamtu United Airlines cungah kaa lawm,” tiah Bruck nih a ti.
