India ram ah a ummi kum 74 si cangmi Erramatti Mangayamma nih August 5 ahkhan ngandam tein faphir nu 2 a hrin. A vapa Raja Rao (kum 78) nih a pawng tein a umpi.
Mangayamma le Raja cu khua an sak ttinak kum 57 si cang i India ram, Andhra Pradesh state ah a ummi an si.
“Kan inn pawng ah a ummi kum 55 nu nih fa a pawimi ka hmuh in fa ngeih ka duh ve,” tiah Mangayamma nih a phuan.
Mangayamma cu fa a ngei bal lomi a si. A thipihnak zong a sau tuk cang.
“Ka lunglawmhnak hi bia in ka chim thiam lo. Kum 60 dengmang ka hngahmi cu atu ah ka hmuh cang. Atu cu, aho hmanh nih a cingmi nu an ka ti ti lai lo,” tiah Mangayamma nih a chim.
Sibawi te nih Mangayamma ci le a vapa ci kha an lak i labotary khan ah an fonh. Nau a sem in Mangayamma nauinn an an rawn. Mirang in IVF an ti.
Nu cu kum khua a hung upat in cun thi a pit cang i kokek tein fapawi khawh a si ti lo. Nain, IVF in cun fapawi tthan khawh a si.
Mangayamma nih “Los Angeles khuapi ah a ummi private sikhan nau pawiternak cu kan tuah. Mah lo ahhin an ka cohlang sual lai lo tiin ka kum ka hlen hna. Nau pawiternak ahhin (£30,000) RM154,000 kan dih,” tiah a chim.
Faphir nu 2 cu thla tlinglo in an chuak nain a ngandam. Kg1.6 veve an si.
2008 ahkhan kum 70 tarnu nih fa a rak ngeih i, vawlei cung fa ngeika nu vialte lakah upa bik tiin an rak ti.
“Hitluk upa cangmi nau kan ngeihter khawh hi cu tuanbia thar kan ttial a si lai ti kan theih caah a dihmi tangka vialte kan liampiak dih hna,” tiah Guntur khua um Ahalya IVF clinic nih a ti. – NST
