July 28 ah Malaysia Ngandamnak Vuanci Zung nih Covid-19 mizaw thar 39 kan hmuhchap hna tiah thawng a thanh.
Malaysia ah hi tluk in mizaw thar tam an hmuh tilonak hi thla 1 leng si cang. June 15 kha a donghnak bik mizaw tambik an hmuh si i mah lio ahcun mizaw 41 an si.
Malaysia Ngandamnak Vuanci Zung bawizik Dr Noor Hisham Abdullah nih, “28 hi ramchung ah aa chawnmi an si, 11 hi ramdang in a rungtlungmi an si,” tiah tuni ah a chim.
Ramchung aa chawnmi 28 chungah 22 cu Malaysia rammi an si i 6 cu ramdangmi an si.
Cun, Sarawak state le Kedah state ah Covid-19 mizaw tampi an hmuh hnanak kong zong a chimfawn.
Malaysia ram ah Covid-19 zawtnak ngei hmuhmi dihlak 8,943 an si cang. Tuni ah Covid-19 in a dam i sizung ttin termi 6 an um, a dammi dihlak 8,607 an si cang.
Atu hi Malaysia ram sizung pawl ah Covid-19 in a zaw liomi mizaw 212 an si. Covid-19 in a thimi 124 an si cang.
Tuni ahkhan Malaysia PM hlun Najib cu Duta biaceih zung ah an chuahpi lio ah a ttanhtu mipi cu a but bak in an i bu. Mah kongah, Dr Noor Hisham nih SOP an zulh lo caah a thinhunnak cu Twitter ah a ttial.
Malaysia cozah nih Covid-19 karh hlah seh tiin zulh phung (khat le khat i hlat piin um ding, atu le tu kut ttawl ding, mask hruk ding, tbt.,) a tuah i nihin tiang a zulmi an tlawmtuk rih.
Tuni i Najib biaceih zung an chuahpi lio i mi a bubu in an ummi nih Covid-19 a karhter lai ti an phang tuk.
