July 8 ah Malaysia ram ah Covid-19 zawtnak ngeimi 3 an hmuh hna. An dihlak in ramdang in a tlungmi an si hna.
Malaysia ram ah Covid-19 zawtnak ngei hmuhmi dihlak 8,677 an si cang.
“Tuni hmuhmi mizaw 3 lak ah Malaysia rammi zong an i tel i, ramdang an um lio in zawtnak ngeimi an si,” tiah Ngandamnak Zung lutlai Datuk Dr Noor Hisham Abdullah nih a chim.
Atu hi Malaysia ram sizung pawl ah Covid-19 in a zaw liomi mizaw 70 an um. ICU ah mizaw 2 an um.
Tuni ah Covid-19 in a dam i sizung ttinter mi 5 an si. Malaysia ram ah Covid-19 zawtnak a um ka in nihin tiang a dammi 8,466 an si cang. A thimi 121 an si.
Malaysia ram ah Covid-19 mizaw tambik an hmuhnak hi Seri Petaling um Mosque (Muslim biakinn) pumhnak ah a si.
Dr Noor Hisham nih Seri Petaling i Mosque ah aa pummi chung in Covid-19 mizaw kan hmuh ti hna lo, a thiang cang, tiah tuni ah a thanh.
Hika Muslim biakinn ahhin tu kum February 27 in March 3 tiang biaknak puai an tuah i minung 16,000 an i pum. Cu chungah 14,500 cu Malaysia rammi an si i 1,500 cu ramdangdang in a rami ramdangmi an si hna.
Pumhnak a dih zarh 1 hnu March 11 ah Malaysia Ngandamnak Zung nih Pahang le Negeri Sembilan um Malaysia rammi 131 le 136 sinah Covid-19 zawtnak rungrul a hmuh. Seri Petaling um Muslim biakinn ah aa pummi an si hna. – The Star
