Malaysia cozah nih Covid-19 zawtnak karh hlah seh tiin lengchuah a khapmi zul loin April 12 ah Thingyan puai a tuahtu Kawlrammi 41 cu tuni ah biaceihzung nih RM1,000 ci0 dan a tat hna.
Dantatmi an liam lo ahcun thla 1 cio thongthla hna uh, tiah peng biaceihtu Boy Acho nih bia a khiah.
Kawlrammi pawl cu kum 19 in 34 kar an si.
Selangor state i Covid-19 mizaw an umnak sang ah Thingyan puai an tuah ruangah palek nih an tlaih hna i Chawnh Khawhmi Zawtnak Khamnak le Vennak Upadi Dal 6 (1) in lengchuah khapmi an buar tiin biaceihzung ah taza an cuai hna. An dihlak in kan sual ko tiah an i phuan.
Sepang khua um kuthruk sehzung rianṭuan pawl an si. April 12 zaan 8:30pm in 10pm tiang pa riahnak inn ah Thingyan puai an tuah.
“Malaysia cozah nih lengchuah le puai tuah a khapmi kong cu an boss zong nih a chimh hna pinah, Malaysia media vialte nih ni fatin an thanh peng i an hngalh tuk ko lai. Mah buin puai an tuah hi cu kan ram upadi an singkhaw hlah maw ti awk in,” tiah tazacuaitu cozah sihni nih biaceihzung ah a chim.
“Puai an tuah lio video Facebook ah an tar i rampumpi a hninh dih. An thil tuahmi ṭih a nun tuk ning an pemh khawhnak hnga le an rianṭuan hawi lawng si loin mi vialte nih cozah lengchuah khapmi an buarnak hnga lo upadi ning tein dantat hna law fim chim hna,” tiah biaceihzung a hal.
Kawlrammi 41 a aiawhtu sihni G.Rajasingam nih, “an dihlak in phungning tein an ra i sehzung ah rian an ṭuan. An sifak tuk hna i khualei in nulepa le chungkhar nih tohmi an si,” tiah biaceihzung ah a chim.
“Hi bantuk lio caan ah kan Kum Thar kan tuahmi cu kan palh tuk tiin an i cohlan dih,” tiah dantatnak neemter deuh dingin a halpiak hna.
An dihlak in RM1,000 cio an liam lai, tiah theih asi. — NST
