Malaysia Ngandamnak Vuanci Pu Khairy Jamaluddin nih, “MySejahtera app a sinpi lomi pawl bawmhnak caah cozah nih zung kan on lai,” tiin thawng a thanh.
Malaysia um Chinmi hi MySejahtera app a sinpi lomi kan tamtuk luakchuak. The Chin Express sinah bawmh a kan halmi lawng hmanh an tamtuk. Cheukhat cu kan tuahpiak khawh ko hna nain cheukhat cu cozah hrimhrim nih tuahpiak a haumi (mah tein tuah awk ṭha lomi) an tamtuk. Atu bantukin cozah nih MySejahtera app a sinpi lomi bawmhnak zung on a timh cu Chinmi ca hrim ah thawngpang ṭha taktak asi.
MySejahtera app ah raikhamsi nai chunhmi certificate a cuan lo ahcun ram thumnak kal khawh asi lo (vanlawng cit khawh asi lo). State dang kal khawh asi lo. Rianṭuan khawh asi lo. Mipi umnak hmun tampi ah kal khawh asi lo – palik nih an hmuh lo ahcun ngah ko lai nain hmuh ahcun tlaih ton khawh asi caah a biapi ngaingai.
Bawmhnak zung cu khuakip le sang tampi ah an on lai. MySejahtera app a sinpi lomi paoh nih va kal in bawmh hal khawh an si lai.
Thaizing February 19 ah World Trade Center Kuala Lumpur ah bawmhnak zung pakhat an on colh lai.
February 26 ah Ideal Convention Centre, Shah Alam ah bawmhnak zung 2nk an on ve lai.
“Na MySejahtera app ah raikhamsi nai chunhmi certificate a cuan lo ahcun, silole MySejahtera app kong he pehtlai in na sinpit lonak um ahcun bawmhnak zung ah va kal law an in tuahpiak lai,” tiah Ngandamnak Vuanci nih rampumpi tadinca ah a thanh.
“State dang le khua dang pawl zongah, a rauh hlan ah MySejahtera bawmhnak zung kan on thluahmah hna lai,” ati.
COVID mizaw thar kong thawngthanh caan an thlen lai
“Zaanlei fatin COVID-19 mizaw hmuh tharmi zat thawng kan thanh tawnmi kha, tuni February 18 thok cun a thaizing 10am pengah kan thanh cang lai,” tiah Ngandamnak Vuanci nih a chimchap.
Charhchan: Bernama (Malaysia cozah tadinca le TV)
