Tuni ah COVID-19 mizaw thar 12 kan hmuh hna, 10 cu ramchungah zawtnak aa chawnmi an si, tiah Malaysia Ngandamnak Vuanci Zung nih a thanh.
Ramchung ah aa chawnmi 10 lakah 7 cu Tawar ah COVID-19 mizaw kan rak hmuhmi hna he aa pehtlaimi an si. 2 cu Sala mizaw bu he aa pehtlaimi an si, tiah Ngandamnak Vuanci Zung Director-general (hmanthlak) nih a chim.
Pakhat cu zawtnak letkhana a ngeih caah Sungai Buloh Sizung ah kan check i kan hmuhmi si, ati.
Ramdang in a rami mizaw 2 cu ramdangmi an si. Syria le Philippines ram ah zawtnak an i ku hnu ah Malaysia a rami an si.
Zawtnak aa thokka in atutiang ah a thimi le dam cangmi telh in Malaysia ah mizaw hmuhmi dihlak 9,212 an si cang.
Tuni ah mizaw 17 an dam i sizung in an ṭinter hna. A dammi dihlak 8,876 an si cang.
A zawmi dihlak dengmang (96.4%) an dam cang tinak asi.
A zaw liomi 211 lawng an um. 8 cu mizaw zual zohkhenhnak (ICU) khaan ah an chiah hna i 2 cu thawpeknak seh an bunh hna.
Tuni ah mizaw a thimi an um lo. Zawtnak aa thokka in atutiang a thimi dihlak 125 an si rih ko. — The Star
