Tuni ah Malaysia ah Covid-19 zawtnak ngeimi 489 an hmuhchap hna i zawtnak ngei hmuhmi dihlak 13,993 an si cang.
Covid-19 zawtnak ngei hmuhmi 489 lakah 2 cu ramdang in a rung tlungmi an si. A tangmi 487 cu ramchung ah zawtnak aa chawnmi an si.
Suimilam 24 chung ah Covid-19 in a dam i sizung in ttin termi 74 an si. Zawtnak aa thok ka in nihin tiang a dammi 10,501 an si cang.
Atu lio sizung pawl ah Covid-19 in a zaw liomi 3,351 an um i mizaw zual zohkhenhnak khan (ICU) ah mizaw 40 an um. Mizaw 13 cu ventilator bunh an si.
Tuni ah Covid-19 in a thimi an um lo. Atu tiang ah a thimi 141 an si.
Runvennak Vuanci Datuk Seri Ismail Sabri Yaakob nih, “Selangor state i Klang khua le Sabah state i Sandakan, Papar le Tuaran khua cu lockdown a si. Hika hmun pawl ah Covid-19 mizaw tampi hmuh an si caah lockdown kan tuahnak hi a si,” tiah tuni ah a chim.
Atu lockdown an tuahnak khua pawl ahcun aho hmanh luh/chuah khawh an si lai lo, mipi caah a herh tukmi supermarket, restaurant, clinic le petrol station pawl lawng rianttuannak nawl pek an si lai. – The Star
