Tuni September 18 ah Malaysia ram ah Covid-19 mizaw 95 an hmuhchap hna i zawtnak ngei hmuhmi dihlak 10,147 an si cang.
Ngandamnak Vuanci Zung director-general Tan Sri Dr Noor Hisham Abdullah nih, “Mizaw thar lakah 4 cu ramdang in a rami an si. 3 cu Indonesia ram in Malaysia ah phungninglo in a rak lutmi an si. A dang pakhat cu Sabah state ah thilkuat rianttuanmi a si.
“A tangmi 91 cu ramchung ah zawtnak aa chawnmi an si. Malaysia rammi 68 le ramdangmi 23 an si” tiah tuni ah a chim.
Ramchung i zawtnak aa chawnmi tambik cu Sabah state ah a ummi an si.
Sizung pawl ah Covid-19 in a zaw liomi 754 ah an kai. Mizaw zual zohkhenhnak (ICU) ah mizaw 11 an um i, 2 cu hawinak in an zual deuh caah cuap thli luhchuah ternak seh (ventilator) bunh an si.
Tuni ah Covid-19 in a dam i sizung in ttin termi 14 an si. Malaysia ram ah Covid-19 zawtnak aa thok ka in nihin tiang a dammi 9,264 an si cang.
Cun, Dr Noor nih Covid-19 in a thimi pakhat a um tiah tuni ah a thanh. Atu tiangah Covid-19 in a thimi 129 an si cang.
“Case-10,145, kum 50 nu cu September 14 ah Sabah state i Semporna sizung ah a thi. Philippines rammi a si” tiah Dr Noor nih a chim.
