Malaysia um Kawlrammi 32 cu Thailand ram tan in Myanmar ram tlun an i timh lio ah Songkhla province, Sadao khua i Golok hlei tangah Thailand nawl ngeitu nih an tlaih hna.
Naupawi nu 8 an i tel.
Covid-19 zawtnak um lio si caah ramri lam pawl an phih hna lio asi nain Kawlrammi 32 cu tanglam in Myanmar ram tlun an i timh lio ah Songkhla province ah an tlaih hna hi a si.
“Puaisa tawlrelnak in Myanmar ram tlun an i tim. Sadao khua an phak ah puaisa nih ni 2-3 chung rawl pek loin ramtang ah a chiah tak hna. An rawlttam tuk. Fur caan si fawn tikah ruahsur le khuasik an celh lo ruangah lam cung ah an chuak i cutin tlaih dawh an si.
“Nau pawi nu 8 an i tel. An dihlak in thla 8,9 an si cang hna i nau ngei deng tete an si hna. Zei ruangah dah nau ngei deng in cun tlun cu nan i timh tiah kan hal hna tikah Malaysia ah boss te nih Covid-19 ruangah sizung/clinic ah an kan piah kho lo an ti.
“Puaisa sinah minung 1 ah Baht 20,000 (RM2,500 leng) an pek. Myanmar rammi lawngte minung 32 an si,” tiah tlaih tongmi Kawlrammi pawl rawl pek ah a va kalmi pakhat nih a chim.
Myanmar ram tlun aa timmi Kawlrammi 32 cu Thailand ramri hngak palek le lahwahkah nih an tlaihmi hna a si tiah Sadao khua palek bawi Praphat Muenphet nih a chim.
Thailand Covid-19 dohnak ah rian a ttuanmi pawl nih an chimnak ah Kawlrammi cheukhat cu an taklin, a cumpi mi zong an um an ti.
Thailand nawl ngeitu nih naupawi nu pawl cu sizung le clinic ah an piah hna. Cun, a tangmi pawl cu khumherhnak (quarantine) hmun ah ni 14 an chiah hna hnu ah lahwahkah upadi in dan an tat te hna lai.
