Malaysia ram ah phungninglo in a ummi siseh, visit in a ra i Covid-19 ruangah aa tapmi le passport/work permit a thih hnu pi tiang a ummi (overstay) Kawlrammi tampi cu Myanmar ram tlun an duh ko nain Malaysia lahwahkah sin liam awk tangka an harsa tiah VOA Burmese nih a ttial.
Malaysia lahwahkah thonginn ah thongthlakmi pawl telhin Myanmar ram tlun a duhmi Kawlrammi pawl cu Myanmar cozah nih vanlawng in lak a timh ko hna nain atu tiang hlawh a tling rih lo.
Naite ah Malaysia lahwahkah nih phungninglo in siseh, visa, passport/work permit thih hnu tiang a um i mah ram ah tlun a duhmi pawl hna caah tangka dantat zat a thanh.
“Lahwahkah bawizik nih thawngthanhnak a tuah lio ah a tambik tangka RM3,100 liam hrimhrim ding tiin a chim.
“A dang cu Upadi ningin nikhat ah RM30 in ni 30 ca ah RM900 liam ding a si. Special Pass ca ah RM100 liam chih si lai. Cun, thla 1 in thla 6 kar si ahcun RM1,000 liam ding a si. Special Pass ca ah RM100 liam chih ding.
“Thla 6 in kum 3 kar si ahcun RM2,000 si lai i Special Pass ca ah RM100 liam chih ding. Kum 3 in a cung lei si ahcun RM3,000 liam ding a si. Cun, Special Pass ca ah RM100 liam chih ding a si,” tiah Myanmar Tanzung ah thongtla lei ttuanvo latu U Thi Hah Maung nih a chim.
Malaysia ram ahhin phungning he phungninglo he a ummi Kawlrammi ting 5 le cheu hrawng an um lai tiah zumh a si.
Covid-19 zawtnak ruangah rian ngeihlo ruangah harsatnak tongmi Kawlrammi tampi an um.
Lungretheih harsat pinah Myanmar ram tlun a duh tuk kon nain tlun khawhlo ruangah lungdongh in amah le mah nunnak aa lami Kawlrammi 14 hrawng an si.
Cheukhat cu Myanmar cozah lak ding an hngah khawh ti lo caah tanglam in Myanmar a tlung i lampi ah tlai tongmi zong an um len. – VOA Burmese
