Malaysia ram ah phungninglo in a ummi Kawlrammi pawl cu Kawlram tlun duh ahcun Malaysia cozah nih tangka dantat ding asi. Cucaah, Myanmar Ramdang Vuanci Zung nih tangka dantat an luatnak hnga Malaysia cozah sinah a nawlpiak hna.
“Malaysia cozah sinah kan nawlmi abiapibik cu tangka dantat kong a si. Tangka dantat luat ter dingin kan nawl. Asi khawh ahcun deport tuahpiak dingin kan chimh,” tiah Myanmar Ramdang Vuanci Zung i Secretary U Soe Han nih a chim.
Myanmar Ramdang Vuanci Zung nih Yangon ah a ummi Malaysia Tanzung lutlai Datuk Zahairi Bin Baharim he tonnak an ngeih lio ah a cunglei bantuk in a hal hi a si.
Naite ah Malaysia Ramdang Vuanci Zung le ṭuanvo ngeitu zung dang pawl cu meeting an tuah. Nain, Myanmar cozah lei nih a halmi kong ah zeihmanh thawngthanhnak an tuah rih lo.
“Result kan hngah lio a si. Hmai zarh hrawng in cun a fiang kho men,” tiah U Soe Han nih a chim.
Malaysia um Myanmar tanzung nih Kawlram tlun a duh i phungninglo in a ummi Kawlrammi pawl minlaknak a tuah. Atu tiangah min a pe cangmi 7,000 leng an si cang.
Cun, Malaysia lahwahkah thonginn ah a ummi Kawlrammi 3,000 pawl zong Myanmar cozah nih duhsah tein ka lak hna lai a ti.
Cupinah, Malaysia ram ah phungning tein a ummi Kawlrammi hna cu harsat ruangah Kawlram tlun an duh ahcun an tlunnak vanlawng ticket man deng tein tuahpiak an si.
Malaysia um phungninglo Kawlrammi pawl tlunnak ah a dih dingmi vialte cu Myanmar cozah nih a liam dih lai. – Myanmar Times
