Ngatlaih rian a ttuanmi kum 36 Malaysia pa cu tuni ahkhan pengkulh biaceih zung nih kum tlinglo a fanu ei a tlaihhrem ruangah kum 202 thong le voi 23 fung tuk dingin bia a khiahpiak.
Nain, sualnak phun 22 in tazacuaimi pa cu biaceihtu nih thong dan kan pekmi hi relpiak tti si hna seh a ti caah kum 38 lawng thong a tla lai.
Mipa nih hin a fanu ei cu 2016 April thla in a tlaihhrem. Mah lio ahhin a fanu ei cu kum 12 lawng a si rih.
Mipa cu a fanu ei a tlaihhrem, a hnuk tawi, a kut in a chiattha a tongh, a fanu ei kaa chungah a zuzu a sawh timi telhin sualnak phun 22 in biaceih zung ah tazacuai a si.
2016 April thla inkhan tu kum September 29 tiang ahkhan an umnak Kampung Tersusun Baru ah a fanu ei cu a tlaihhrem.
Ngakchia nute a nu le mipa hi an i tthen cang nain inn pakhat chungah an um tti. Nuva bantuk in innkhan pakhat ah an it tti ti lo.
“Ka pa ei nih a ka tlerh zungzal i ka ttih tuk. Ka huat tuk fawn. Ka nu nih i tthennak ca a ap lio ahhin inn khat ah kan um tti ti lai lo tiin kaa lawm tuk” tiah ngakchia nute nih biaceih zung ah a chim.
September 30 ah hringtu a nu nih SD card chung i ‘AnakKu (Ka fapa) timi tlangtar chungah hmanthlak a hmuh hnu ceo in ka fanu a tlaihhrem ti a theih.
Mah ni ahcun palek sinah a report i, a vapa cu an tlaih colh.
“Mipa nih hin a mah diriamnak caah a fanu ei cu a hman. Ngakchia nu cu thinphang in a um. Cucaah, mipa hi fak piin dantat uh” tiah tazacuaitu nih biaceih zung ah a hal. – The Star
