15.6 C
Hakha
Sunday, April 18, 2021
- Advertisement -

Ṭial Tharmi

Malaysia Palek nih UNHCR Card aa Tlaihmi Myanmar Pa Thi Lakin an Kah

Myanmar pa a firtu Myanmar pa cu Malaysia palek nih nizaan ah thi lakin an kah.

Myanmar pa cu September 1 ah Penang state palek nih Paya Keladi khua leng um ungti lo thlam ah tlaih dingin an kal hnawh. Namtong in a zuanh hna caah thi lakin an kah hi si.

Penang state palek bawizik Datuk Manan nih, “August 14 ah ngakan rianṭuan Myanmar pa a firtu kum 25 Myanmar pa cu cuka ah kan hmuh tiin thawng a kan thanh caah September 1 deihlan 1:30am hrawngah palek nih lo thlam ah an kal hnawh,” tiah a chim.

“Tlaih dingin kum 30 hrawng a simi palek pa nih thlam kutka a on i Myanmar pa nih namtong in a hung tuk.

“Palek pa cu aa phet pah in vawlei ah a tlu. Myanmar pa nih palek dang pawl zong tuk dingin a orh hna.

“Tuah awk dang an ngeih ti lo caah anmah i vennak caah an kah i a hmun ah a thi,” tiah palek sakhann ah media sinah a chim.

“Voi 4 an kah.

“Mah lio hin thlam cu a mui dih i pazawngdan pakhat te lawng aa vang.

“Thlam chungah palek an luh cun, Myanmar pa ruak lawng an hmuh.

“Palek pa cu a liang ah hliam a tong. Namtong cu kan tlaih.

“Palek nih an check hnu ah UNHCR card an hmuh. A UNHCR card cu a deu si kho men, kan check lio asi.

“Ngakan ah rianṭuanmi kum 37 Myanmar pa cu hipa le a hawile nih August 14 ah an rak fir. Hipa hi fir dingin khuakhangtu le hruaitu asi.

“Myanmar ram ah a ummi a nupi sinah RM15,000 (Kawlram ting 40 leng) in rak tlanh an ti. A nupi nih cun Myanmar um Moneywave in RM14,000 a kuat hna.

“A nupi nih a vapa hawipa a chimh i August 17 ah a hawipa nih cun palek sakhan ah report a tuah.

“A kuatmi hna tangka cu Malaysia bank account tam nawn ah an luhter. Bank account ngeitu pawl cu Penang le Kedah state ah a ummi an si.

“Bank account ngeitu pawl an umnak Kedah state i Sunglai Lalang khua leng um khairiat lo thlam kan luhhnawh. Malaysia rammi pa 2 le Myanmar pa kan tlaih hna.

“Mah hnu cun Myanmar pa pakhat kan tlaih chap. Bia kan hal hnu ah Bukit Lembu khairiat lo thlam ah an rak hrenmi fir tong Myanmar pa cu a thlah.

“Mah hnu ah Penang state hmun tlawmpal ah tlaihkhihnak kan tuah ṭhan i minnung 7 kan tlaih hna.

“Kan rammi pa 3 le Myanmar rammi pa 3 le nu 1 an si. Kan tlaihmi dihlak minung 11 cu kum 18 in 45 kar an si hna.

“Bia kan hal hna hnu ah kan rammi 5 cu kan thlah hna. Myanmar rammi 6 lakah 3 cu minung fir case in taza kan cuai hna lai i adang 3 cu phungninglo in Malaysia luh case in kan cuai hna lai.

“Minung firtu lakah aa tel vemi kum 30 hrawng simi Myanmar pa zong kan kawl lio asi. Kan tlai kho rih lo,” ati.

Kum 1961 Minung Fir Upadi Dal 3 in hlathlainak an tuah lio asi.

Palek nih “Myanmar rammi” ti lawng an chim i an min le miphun an chim lo. Malaysia ah minung fir le tangka in tlanhter a hmangmi cu Rohingya deuh an si tawn. Tutan hi cu zei miphun an si kan hngal lo.

- Advertisement -

Ṭial Tharmi

Tuni ah ralkap nih minung 2 meithal in an kah hna

Tuni Zarhpini ah, Mandalay ramṭhen Myingyan khua ah tlangval pakhat cu ralhrang Myanmar ralkap nih meithal in an kah caah a nunnak caah thinphan...

Sihni Salai Dawt Cung Lian inn ah gas a puak i a nunnak liam

Sihni Salai Dawt Cung Lian cu an inn ah gas a puak i a nunnak liam tiah kan theih. An nih hi Mandalay ah ralkap...

Yangon ah bomb a puak i ralkap 3 hliam tong

Nizaan ahkhan Yangon ah bomb tam ngai a puak i ralhrang Myanmar ralkap a tlawmbik 3 paoh hliam an tong, tiah The Irrawaddy media...
- Advertisement -

Bill Gates nih ‘mah 3’ a thiammi hi cu hmailei ah rian tha an hmu kho lai ati

Vawlei cung mirumbik 4nak a simi Bill Gates cu hmailei kong lawngte ah a buai khim ko. Thil thar sertu le sipuaizi thlengtu pawl he...

Apoi tuk: Min Aung Hlaing cu ASEAN Meeting a kai lai

Uknak firtu Myanmar ralkap bawizik Min Aung Hlaing cu April 24 ah tuah ding ASEAN meeting ah an sawm ve caah Indonesia a tlawng...

Subscribe to Youtube

The Chin Express cu kan Chin mipi caah free tein ni fatin thawngpang dik thanh aa zuam pengmi kan si. Kan video hmuh na duh ahcun kan Youtube channel ah 'Subscribe' tuah ve.

- Advertisement -
- Advertisement -